Шавкат Мирзиёев 17 февраль куни маҳаллалар ҳаёти ва саноат корхоналари фаолияти билан танишиш учун Бухоро вилоятига борганди. Давлат раҳбари “Работиқалмоқ” маҳалласида бўлиб, аҳоли ҳаёти билан танишди, деб хабар бермоқда Президент матбуот хизмати.
Қайд этилишича, бу ерда 9 мингдан зиёд аҳоли яшайди. Илгари фойдаланилмай ётган майдонда тикувчилик корхонаси қурилиши натижасида 30 дан ортиқ хотин-қиз ўз маҳалласида ишли бўлган. Корхона 100 мингта трикотаж маҳсулотлари учун буюртма олган.
Давлат раҳбари мазкур корхона фаолияти билан танишиб, ишчилар билан суҳбатлашган.
“Маҳалладаги ўзгаришларни, сизнинг ишли бўлганингизни кўриб, хурсанд бўлдим. Булар — халқ ичига кириб, халқ билан бирга қилаётган саъй-ҳаракатларимизнинг кичик бир натижаси. Агар ҳокимлик ва ташкилотлар шароит яратиб беролса, ҳар бир оила ўзини эплаб кетолса, мақсадимга эришган бўламан. Шунда катта оиламиз — давлатимиз ҳам мустаҳкам бўлади”, — деган президент.
Таъкидланишича, шу ерда вилоятдаги тадбиркор аёлларнинг ҳанармандчилик маҳсулотларидан намуналар намойиш этилган. Улар ишлаб чиқаришда ва касаначилик асосида хотин-қизлар бандлигини таъминлаётганини сўзлаб берган. Давлат раҳбари уларнинг бу борадаги ҳаракатларини қўллаб-қувватлаш бўйича мутасаддиларга кўрсатмалар берган.
“Работиқалмоқ” маҳалласида яна 10 дан ортиқ савдо ва сервис шохобчалари, Тадбиркорларга хизмат кўрсатиш маркази ҳам бор. Маҳалла фуқаролар йиғини биноси таъмирланган. Аҳолининг бўш вақти мазмунли ўтиши учун “Отахонлар чойхонаси”, кутубхона, спорт майдончаси, ҳаммом ва хиёбонлар ташкил этилган.
Давлат раҳбари бу шароитларни кўздан кечирган, шу ерлик Бахтиёр Пўлатов хонадонида меҳмон бўлган.
Изоҳ (0)