Шавкат Мирзиёев 17 февраль куни Бухоро вилояти Шофиркон туманидаги “Бухара Азтекс” тикувчилик корхонаси фаолияти билан танишди. Бу ҳақда Президент матбуот хизмати хабар қилди.
Қайд этилишича, бу ерда пахта етиштириш ва уни чуқур қайта ишлашнинг тўлиқ занжири йўлга қўйилган. Шу боис маҳаллийлаштириш даражаси 100 фоизга етган.
Лойиҳанинг қиймати 8,7 миллион доллар. Ускуналар Япония, Германия ва Туркиядан келтириб ўрнатилган. Минг нафардан ортиқ киши иш билан таъминланган.
Корхонада йилига 16 миллион дона тайёр тикувчилик маҳсулотлари ишлаб чиқарилади. Уларнинг 50 фоизини хорижга экспорт қилиш мўлжалланган.
Давлат раҳбари корхонада тайёрланаётган маҳсулотлар сифатини кўздан кечирган, ишчилар билан мулоқот қилган.
Бундан ташқари, корхона томига қуёш панеллари ўрнатилган. Президент бу каби корхоналарни кўпайтириш, аҳоли бандлигини таъминлаш юзасидан мутасаддиларга кўрсатма берган.
Изоҳ (0)