Прогнозлаштириш ва макроиқтисодий тадқиқотлар институти (PMTI) экспертлари томонидан 2022 йил натижалари бўйича ҳудудий меҳнат бозори индекси (МБИ) ҳисоблаб чиқилди.
-36.jpg)
Меҳнат бозори индекси меҳнат бозоридаги ҳолатни баҳолаш ва мониторинг қилишда ёрдам берувчи индекс бўлиб, меҳнат бозорининг жорий ҳолатини бевосита акс эттирувчи 5 та кўрсаткични ўз ичига олади.
МБИни ҳисоблаш учун ишсизлик даражаси, мавжуд бўш иш ўринлари ва резюмелар сони, меҳнат бозоридаги концентрация коэффициенти ва ўртача ойлик маош миқдори каби кўрсаткичлардан фойдаланилди.
Меҳнат бозори индексини ҳисоблаш натижаларига кўра, ҳудудлар индекс кўрсаткичлари юқори, ўрта, паст ва ўта паст бўлган тўртта гуруҳга бўлинди.
2022 йил якунларига кўра, индекс кўрсаткичлари юқори бўлган гуруҳга Тошкент шаҳри, Навоий ва Тошкент вилоятлари кирди. Бу ҳудудларда ишсизлик даражаси республика бўйича ўртача кўрсаткич (8,9 фоиз) дан паст—– Тошкент шаҳрида 6,5 фоиз, Навоий вилоятида 8 фоиз, Тошкент вилоятида 8,8 фоиз.
Ўрта гуруҳга Бухоро, Андижон, Фарғона, Сирдарё, Хоразм, Наманган вилоятлари кирди. Бу ҳудудлардаги ўртача ойлик маош мамлакат миқёсидаги ўртача кўрсаткичнинг 80 фоизидан кам эмас.
Меҳнат таклифи эса нисбатан ўртамиёна, яъни битта бўш иш ўрнига ўрта ҳисобда 5,6 та резюме тўғри келади. Ишсизлик даражаси 9,1 фоиздан ошмайди.
Жиззах, Самарқанд, Сурхондарё вилоятлари ва Қорақалпоғистон Республикаси индекс кўрсаткичлари паст бўлган ҳудудлар қаторига киради.
Ушбу ҳудудларда энг юқори концентрация коэффициенти кузатилди, яъни битта бўш иш ўрнига Қорақалпоғистон Республикасида 17,4 та, Сурхондарёда 14,1 та, Жиззах вилоятида 12 та резюме тўғри келади.
Қашқадарё вилоятида меҳнат бозори индекси жуда паст, аниқроғи 2,2 ни ташкил этди. Бунинг асосий сабаби ҳар бир бўш иш ўрнига 16,8 нафар талабгор тўғри келиши, яъни бўш иш ўринлари сони иш қидираётганлар сонидан анча кам ва ўртача ойлик маош Ўзбекистондаги ўртача кўрсаткичдан анча паст эканлигидир.
Изоҳ (0)