Россия ҳукумати сўнгги йилларда мамлакат президенти Владимир Путиннинг қароргоҳларига олиб борувчи темирйўл линиялари ҳамда бир нечта махфий станцияларни қурган, деб хабар бермоқда “Проект” нашри.
Путиннинг Новгород вилояти Валдай шаҳридаги қароргоҳидан унча узоқ бўлмаган жойда қўриқланадиган вертолёт майдончаси ва темирйўл станцияси жойлашган. “Проект” журналисти уни 2022 йилнинг кузида Долги Бороди қишлоғи яқинидаги Валдай миллий боғи ҳудудида аниқлаган. Нашр томонидан ўрганилган сунъий йўлдош суратларига кўра, Валдайдаги Путин учун вокзал ва темирйўл 2019 йилда қурилган. Улардан фақат президент ҳаракати учун фойдаланилади, деди “Проект”га 3 нафар маҳаллий аҳоли.
Путиннинг Москва вилояти Ново-Огарёво туманидаги қароргоҳи яқинидаги темирйўл вокзали 2015 йилда қурилган — сунъий йўлдошдан олинган суратлар шуни кўрсатмоқда. Станция қароргоҳдан 400 метр узоқликда жойлашган. Унинг остидаги ер ўша пайтларда Россия ҳукуматини бошқарган Дмитрий Медведевнинг қарори билан хусусий мулкдан ажратиб берилган. Станция баланд панжара ортига яширинган.
“Проект” маълум қилишича, 2017 йилда Сочида Путиннинг “Бочаров ручей” қароргоҳи яқинида темирйўл платформаси ва боши берк темирйўл тармоғи қурилган бўлиб, у бошқа поездлар ҳаракатланадиган релслардан панжара билан бекитиб қўйилган
Аввалроқ “Досе” суриштирув маркази 2021 йилнинг иккинчи ярмида Россия президенти ташқи кўринишидан оддий поезддан унчалик фарқ қилмайдиган зирҳли поездда ҳаракатлана бошлагани ҳақида хабар берганди. Сота нашри президентнинг зирҳли поездидан Москвадаги Комсомолская майдони яқинида жойлашган махсус станцияда фойдаланилаётган бўлиши мумкинлигини даъво қилди. “Проект” билан суҳбатлашган Россия темирйўллари собиқ машинистининг сўзларига кўра, зирҳли поезд Москва-Каланчевская вокзалидаги депода жойлашган. Юқори мартабали шахслар учун ёпиқ вокзал мавжуд.
Изоҳ (0)