Футбол бўйича Европа Суперлигаси яна жонланди. Мусобақа атрофидаги гап-сўзлари яна кўпайиб қолди.
“Барселона”, “Реал” ва “Ювентус” Суперлигани қайта ишга туширишга тайёргарлик кўраётганини маълум қилганди. Мусобақанинг янги талқинида бир нечта дивизионлар ва унда иштирок этувчи 60-80 та клуб бўлади.
Европа Суперлигаси бош директори Бернд Рейхарт Германиянинг Диэ Welt газетасида ўз мақоласини эълон қилди ва унда турнирга асос бўладиган 10 та тамойилни тилга олди.
Европа Суперлигасига асос бўлувчи 10 тамойил.
1.Турнир марказида спорт ютуқлари туради.
Суперлигада 60 тадан 80 тагача жамоа иштирок этади. Бу бир нечта дивизионларга бўлинган очиқ мусобақа бўлади. Даромад турнирнинг барча аъзолари ўртасида тақсимланади. Суперлигада иштирок этиш мавсумдаги спорт натижаларига боғлиқ бўлади. Унда доимий аъзолар бўлмайди.
2. Миллий чемпионатлар — футболнинг асосидир.
Клублар аввалгидек миллий чемпионатларда ўйнашда давом этади. Европа Суперлигаси ташкил этилиши билан миллий чемпионатлар янада қизиқарли бўлиши кутилмоқда, чунки янги турнир иштирокчиларни қўшимча ресурслар билан таъминлайди.
3. Барқарор даромад олиш орқали рақобатбардошликни ошириш
Даромаднинг ўсиши ва молиявий барқарорлик қоидаларига қатъий риоя қилиш орқали Европа клублари рақобатбардошликни янада оширади. Европа Суперлигаси йўлланмасини қўлга киритган клубларга бир мавсумда камида 14 та Европа даражадасидаги ўйинлар кутиб туради. Шунинг ҳисобига даромад барқарор бўлади.
4. Футболчиларнинг соғлиги — энг муҳими.
Йиллик ўйинларнинг сони ҳақида гапираётганда биринчи навбатда спортчиларнинг соғлиги муҳим аҳамият касб этади. Ўйинчилар уюшмасини эътиборини ҳам жалб қилиш лозим. Ўйинлар сони ҳозиргидан кўп бўлмаслиги керак. Қайд этилишича, учинчи томон футболчиларни янги мусобақаларда ва эскиларининг кенгайтирилган талқинларида иштирок этишга мажбурлай олмайди.
5. Молиявий барқарорлик қоидаларига қатъий риоя этилиши лозим.
Европа клублари мусобақаларини жамоаларнинг ўзлари ташкил этиши керак. Клубларнинг сарф-харажатлари рақобатни бузадиган сармоя киритишга эмас, балки фақат ишлаб топилган маблағларга асосланган бўлиши керак. Молиявий барқарорлик қоидалари клубларга футбол билан боғлиқ йиллик даромадларининг фақат белгиланган фоизини маош ва трансферларга сарфлаш имконини беради.
6. Дунёнинг энг яхши спорт мусобақаси.
Янги турнир дунёнинг энг қизиқарли спорт тадбири даражасига чиқиши керак. АҚШда спорт ва рақамли ўйин-кулгуларнинг дунё бўйлаб тарқалишига иштиёқли ёш авлоднинг футболга бўлган иштиёқини қўллаб-қувватлаш керак. Бунга дунёнинг энг яхши футболчилари мавсум давомида мунтазам равишда учрашадиган турнир орқалигина эришиш мумкин.
7. Мухлислар учун ҳам яхши тажриба.
Мухлислар билан мулоқот орқали футболни қандай яхшилаш бўйича ғояларни ишлаб чиқса бўлади. Меҳмондаги ўйинларга ташриф буюришни ҳар томонлама қўллаб-қувватлаш зарур. Стадионларга ягона, юқори сифат даражасига олиб чиқадиган инфратузилма стандартларини ўрнатиш лозим.
8. Аёллар футболини молиялаштиришни яхшилаш.
Аёллар футболини ривожлантиришда давом этиш керак, шунинг учун уни молиялаштиришни сезиларли даражада ошириш зарур. Инвестиция нафақат профессионал, балки ҳаваскор даражаларга ҳам керак.
9. Бирдамлик тўловларининг сезиларли даражада ошиши.
Суперлигада иштирок этмаётган клубларга бирдамлик тўловлари, шунингдек, ижтимоий мақсадлардаги тўловлар йилига камида 400 миллион еврони ташкил этади — бу ҳозиргидан икки баравар кўп.
10. Европа Иттифоқи қадриятлари ва қонунлари ҳурмат қилиниши керак.
Европа Иттифоқининг қадриятлари, қонунлари ва эркинликлари Европа клублари футболининг асосини ташкил қилиши керак. Спорт трибуналларининг юрисдиксияси фақат спорт масалалари билан чекланиши лозим. Бошқа барча низолар ваколатли судлар томонидан кўриб чиқилиши ва барча ишлар Европа Иттифоқи адлия органларининг назорати остида бўлиши керак.
АПЛнинг айрим жамоалари мусобақа иштирок этишни хоҳламаяпти
Sky Sports нашрининг хабарига кўра, Премьер Лиганинг бир нечта жамоаси лойиҳани “кулгули” дея ҳисоблаб, ундан масофа сақлаб турибди.
АПЛнинг 5 жамоаси Суперлигада иштирок этишдан бош тортган. Номи ошкор этилмаган Лондон клубининг раҳбарларидан бири янгиланган лойиҳани “қуруқ гап” деб ҳисоблаган.
“Манчестер Юнайтед” бош мураббийи Эрик тен Ҳаг Суперлига ҳақида қуйидагича фикр билдирди: “Бошқалар бу лойиҳани ўрганмоқда ва шундан сўнг менга хабар беришади. Вақти келиб қандайдир қарор қабул қилинади. Албатта, бу ҳақида клуб қайғуради.
Ҳозирги тизимни (Европа футболи) яхши деб ҳисоблайман, бироқ футболни яхшилаш учун қанақадир ўзгаришлар қилиниши лозим, ҳаёт шунақа.
Одамлар ҳар доим энг зўрини қуришга ҳаракат қилади. Агар бу футболга фойдали бўлса, диққатга сазовор бўлади”.
Суперлига раҳбарияти АПЛ клубларининг норозилигидан хавотирда эмас
“Лойиҳамиз битта ҳудудга боғланиб қолмаган. Ҳеч нарсани истисно қилмайман ва биз Европанинг энг яхши турнирини ўтказишни хоҳлаяпмиз.
Агар бирор мамлакат, футбол ассоциацияси ёки бирор лига бизга қўшилишни истамаса, лойиҳа ўлди дегани эмас”, — айтиб ўтди Европа Суперлигаси лойиҳаси бош директори Райхарт.
Ла Лига раҳбари ҳам Суперлигани танқид остига олди
“Алданиб қолишингизга йўл қўйманг. Бу топ-жамоаларнинг Европа футболини эгаллашга қаратилган янгича уриниши. Йиллар давомида топ-жамоалар бир неча бор Европа футболининг турли органларини гаровга олиб, кўпроқ пул ва кучга эга бўлган.
Суперлига бош директори — Европа футболини тўлиқ назорат қилиш ва уни ҳамма учун эмас, балки фақатгина элита учун спорт турига айлантиришни мақсад қилган топ-жамоаларнинг янги юзидир.
Райхарт ва унинг дўстлари томонидан ўйлаб топилган мусобақа ҳозирги футбол моделига нисбатан кўтарилган қўзғолон. У ҳақиқатан ҳам лигалар етакчиларини шундай жоҳил деб ҳисоблаяптими?
Миллий чемпионатларда ғалаба қозониш Европанинг юқори дивизионига тўғридан-тўғри чиқишни кафолатламайди. У фақатгина катта клублар учун аталади.
Жаноб Райхарт ва унинг дўстлари ўзларини энг ақлли, УЕФА, ассоциациялар, лигалар, клублар ва мухлисларни аҳмоқ деб ўйлаяптими?”, — дейди Ла Лига раҳбари Хавьер Тебас.
Изоҳ (0)