Туркия ва Сурияда 6 февраль куни юз берган зилзилалардан жабрланганларга спорт олами вакиллари ҳам ўз ёрдам қўлларини чўзмоқда.
“ПСЖ” ҳужумчиси Лионель Месси Туркия ва Суриядаги талафотлардан жабрланган инсонларга ёрдам бериш мақсадида 3,5 миллион евро юборган.
Туркиянинг “Галатасарой” клуби ўз стадионида гуманитар ёрдам йиғиш пунктини ишга туширди. Ушбу ишларда клубнинг қатор футболчилари кўнгилли сифатида ёрдам бермоқда. Хусусан, жамоанинг белгиялик легионери Дрис Мертенс ҳам жамоадошларига кўмаклашяпти.
Шунингдек, “Истанбул Башакшеҳир”, “Бешиктош” ва “Фенербаҳче” клублари ҳам ўз ареналарида кўнгиллилар учун хайрия буюмлари йиғиш пунктларини ташкил қилган.
“Истанбул” клуби ярим ҳимоячиси Месут Ўзил волонтёрлик ишларида фаол қатнашмоқда. Футболчи ўз Twitter саҳифасида “Биргаликда қийин вазиятларни енгиб ўтиш мумкин”, — дея изоҳ қолдирган.
Португалиянинг “Бенфика” жамоаси Лиссабондаги Туркия элчихонасига 1000 дона термоёпинчиқ юборган.
“Аталанта”нинг туркиялик футболчи Мерих Демирал “Ювентус”даги собиқ жамоадошлари Криштиану Роналду, Пауло Дибала ва Леонардо Бонуччининг либосини кимошди савдосига қўйиб, тушган пулларни хайрияга йўллади.
Уч футболчининг либоси жами 5 миллион лирага (250 минг евро) сотилган. Шунингдек, Демирал “Атлетико” ҳужумчилари Антуан Гризманн ва Альваро Мората ҳам ўз имзолари туширилган либосларини тақдим этишга рози бўлгани ва улар аукционга қўйилганини маълум қилди.
“Мен Криштиану билан гаплашдим. У Туркияда содир бўлган ҳодисалардан чуқур қайғуда. Биз коллекциямда турган Роналдунинг имзоси туширилган либосни кимошди савдосига қўямиз. Ундан келиб тушган пуллар эса зилзила бўлган ҳудудлардаги инсонларга етказилади”, — деб ёзади Демирал ўз саҳифасида.
Келиб чиқиши турк бўлган германиялик футболчи Илкай Гундўған зилзиладан жабр чекканларга иккита юк машинасида егулик юборган. Шунингдек, “Манчестер Сити” футболчиси яна қўшимча ёрдам юборилишини маълум қилган.
Бизнинг бор ўй-хаёлларимиз айни вақтда фалокат юз берган ҳудудларда бўлиб турган одамларда. Ҳозир ҳамма бирликда ҳаракат қилиши муҳим. Одамлар бизнинг ёрдамга муҳтож. Айни вақтда биз қўшимча озиқ-овқат, болалар озуқаси, ёпинчиқ, гигиена воситалари ва иссиқ кийим йиғишга ҳаракат қиляпмиз. Шундан кейин уларни Туркияга жўнатишни ташкил қиламиз, — дейди Гундўған.
Туркия футбол федерацияси ҳам жабрланганларга 20 миллион лира (1 миллион доллар) хайрия қилди.
“Бизнинг қалбимиз вайроналар остидан олиб чиқилаётган ва олиб чиқилишини кутаётган биродарларимиз билан бирга. Бутун Туркиянинг фикр-у хаёли жабр чекканларда.
Биз хайрия компаниясини бошлаяпмиз ва 20 миллион лирани фалокатдан азият чекканларга юборамиз. Мамлакатда сўнгги пайтларда юз берган энг катта офатлардан бири бўлган ушбу зилзила жароҳатларини биргаликда даволашимизга ишонамиз.
Барча терма жамоа аъзоларини, клубларни ва уларнинг раҳбарларини, барча футболчиларни, мураббийларни, ҳакамлар-у мухлисларни хайрия акциямизни қўллаб-қувватлашга чақирамиз”, — дейилади Туркия футбол федерацияси баёнотида.
6 февраль куни Туркиянинг жануби-шарқий қисмида 7,7 магнитудали зилзила содир бўлди. ер қимирлашлари оқибатида Туркия ва Сурия қатор вилоятларидаги уйлар вайронага айланди. Туркия президенти Ражаб Тоййиб Эрдўғон мамлакатда 7 кунлик миллий мотам эълон қилди, табиий офатдан жабр кўрган ўнта вилоятда 90 кунлик фавқулодда ҳолат жорий этилди.
Сўнгги хабарларга кўра, Туркияда табиий офатдан ҳалок бўлганлар сони 17 674 нафарга, жароҳатланганлар сони 72 879 нафарга етди. Сурияда эса камида 3 377 киши ҳалок бўлди, жароҳатланганларнинг умумий сони 21 051 нафарга етган.
Изоҳ (0)