Orol dengizining suvi qurigan tubida 2023-yilda “yashil qoplamalar” barpo etish uchun jami 25 mlrd soʻm mablagʻlar talab etiladi. Bu haqda AOKAda oʻtkazilgan brifingda Oʻrmon xoʻjaligi agentligi axborot xizmati rahbari Otabek Ashurov maʼlum qildi.
Otabek Ashurovning soʻzlariga koʻra, 2023-yilda 100 ming gektar maydonda “yashil qoplamalar” himoya oʻrmonzorlari barpo etiladi. Ushbu “yashil qoplamalar”ni barpo etish va xatosini toʻldirish uchun jami 420 tonna saksovul, qandim, qoraburoq kabi choʻl oʻsimliklarining urugʻlarini jamgʻariladi. 100 gektar maydonda saksovul va boshqa choʻl oʻsimliklaridan niholxonalar tashkil etiladi.
Maʻlum qilinishicha, zarur miqdordagi texnika va mexanizmlar, mutaxassis va ishchi-xodimlar, shuningdek, ixtiyoriy ravishda aholi oʻrmon meliorativ tadbirlarni amalga oshirish uchun jalb etiladi.
Vazirlar Mahkamasining 20-yanvarda farmoyishi asosida 2023-yilda “yashil qoplamalar” barpo etishni moliyalashtirish belgilandi. Mazkur farmoyish boʻyicha Orol dengizining suvi qurigan tubida 2023-yilda “yashil qoplamalar” barpo etish uchun jami 25 mlrd soʻm mablagʻlar talab etiladi.
Qayd etilishicha, moliyalashtirish manbaalari boʻyicha Ekologiya, atrof muhitni muhofaza qilish va chiqindilar bilan bogʻliq ishlarni amalga oshirish jamgʻarmasidan 5 mlrd soʻm, Oʻrmon xoʻjaligini rivojlantirish jamgʻarmasidan 5 mlrd soʻm, Aksiyadorlik tijorat banklaridan 5 mlrd soʻm, Qoraqalpogʻiston respublika byudjetining oshirib bajarilgan qismi hisobidan 10 mlrd soʻm ajratiladi. Bundan tashqari, oʻtgan yillardagi mavjud qarzdorliklar uchun Vazirlar Mahkamasining zaxira jamgʻarmasidan 5,5 mlrd soʻm maqsadli mablagʻlarni ajratilishi koʻzda tutilmoqda.
Bundan tashqari, Orolboʻyi mintaqasi boʻlgan Navoiy viloyatida 50 ming gektar, Buxoro viloyatida 40 ming gektar hamda Xorazm viloyatida 11 ming gektar maydonda “yashil qoplamalar” barpo etildi.
Eslatib oʻtamiz, avvalroq Orol dengizining qurigan tubida oʻrmonzorlashtirishning navbatdagi mavsumi boshlangani xabar qilinangandi.
Izoh (0)