BMT Qochqinlar boʻyicha agentligi, BMT Qochqinlar boʻyicha Oliy komissarligi 8-fevral kuni Oʻzbekiston hukumati koʻmagida Termiz shahridagi xalqaro koʻp funksiyali transport-logistika xabi orqali Afgʻonistonga navbatdagi begʻaraz yordamini joʻnatdi, deb xabar bermoqda O‘zA.
Qayd etilishicha, ushbu transport-logistika xabidan begʻaraz yordam yuki ortilgan avtomashinalar karvoni “Ayritom” chegara oʻtkazish punkti orqali qoʻshni mamlakatning Mozori Sharif shahriga joʻnab ketdi.
BMT Qochqinlar boʻyicha Oliy komissarligi mutasaddilarining taʼkidlashicha, Oʻzbekiston koʻmagida qoʻshni mamlakatga 12 ta yuk mashinasiga yuklangan 48 mingdan ortiq koʻrpa (adyol) qahraton sovuqda himoyaga muhtoj afgʻon xalqining hayotini saqlab qolishda muhim oʻrin tutadi.
“Biz Oʻzbekiston hukumati bilan jafokash afgʻon xalqiga hayotiy insonparvarlik yordami koʻrsatishni davom ettirish uchun barcha saʼy–harakatlarni amalga oshirmoqdamiz. Hamkorlikdagi ishimiz bu yilgi sovuq qishda ham juda muhim ahamiyat kasb etayotir. Chunki, bu safargi insonparvarlik yordami Afgʻonistondagi koʻplab himoyaga muhtoj insonlarning koʻrpaga (adyol) boʻlgan ehtiyojini qondiradi”, — degan BMT Qochqinlar boʻyicha Oliy komissarligi katta maslahatchisi Frenk Remus.
Izoh (0)