Ўзбекистонда катта тувалоқ қушлари қишламоқда (фото)

Жиззах ва Самарқанд вилоятларида катта тувалоқ (отис тарда) қуши қишлаётганини аниқланди. Бу ҳақда Табиат ресурслари вазирлиги ахборот хизмати хабар берди.

Қайд этилишича, илмий ходимлар “Ўзбекистон очиқ сув ҳавзаларида қишлаб қолувчи сув қушларининг қишки саноғи” лойиҳаси доирасида қушларнинг 2023 йилги қишки саноғини ўтказиш ишларини олиб бормоқда.

Катта тувалоқ Устюрт ясси текислигида, Жануби-шарқий Қизилқум, Сирдарё, Чирчиқ, Оҳангарон ва Зарафшон дарёси воҳаси, Сурхондарё ва Шеробод дарёларнинг қуйи қисмларидан учиб ўтади ва номунтазам қишлайди. Ўзбекистондан ташқарида, Европа, Шимолий Африка, Қозоғистон, Ғарбий Осиёда уялайди ва қишлайди.

Ўзбекистон Қизил китобига киритилган ушбу ноёб турдаги қушлар сони овчилик ҳамда яшаш ерларининг қисқариши оқибатида кескин камайиб кетган. Институт ходимлари томонидан ушбу қушнинг яшаш тарзи ва муҳофазаси бўйича маълумотлар жамланиб, тегишли тартибда рўйхатга олинди. Катта тувалоқ бутунлай йўқ бўлиб кетиш арафасида турган, учиб ўтувчи қушларнинг кенжа тури ҳисобланади.