Англия Премьер Лигаси “Манчестер Сити” клубини 100 дан ортиқ молиявий қоидаларни бузганликда айбламоқда.
Премьер Лиганинг расмий сайти маълум қилишича, “шаҳарликлар” 2009/10 йилги мавсумдан 2017/18 йилги мавсумга қадар жуда кўп қоидаларни бузган.
Тергов ишлари 4 йилдан ортиқ давом этди. Жараён 2018 йил декабрда Дер Spiegel газетасида “Манчестер Сити”даги молиявий қоидабузарлик ҳақида мақола чоп этилганидан сўнг бошланган.
2009/10 йилги мавсумдан 2017/18 йилги мавсумгача бўлган йилларда манчестерликлар молиявий аҳволи ҳақида аниқ маълумот бермаган. Гап даромадлар (шу жумладан, ҳомийлардан келадиган даромадлар) ва операцион харажатлар ҳақида кетмоқда.
Премьер Лига маълумотларига кўра, 2009/10 йилги мавсумдан 2012/13 йилги мавсумга қадар “Манчестер Сити” мураббийнинг маоши ҳақидаги тўлиқ маълумотларни киритмаган. Худди шундай қоидабузарликлар 2010/11 йилги мавсумдан 2015/16 йилги мавсумгача айрим футболчиларга нисбатан ҳам содир этилган.
Қайд этилишича, 2013/14, 2014/15 ва 2017/18 йилги мавсумларда “шаҳарликлар” УЕФА клубларини лицензиялаш ва молиявий фейр-плей қоидаларига риоя қилмаган.
2015/16 йилдан 2017/18 йилгача бўлган мавсумларда эса клуб Премьер Лиганинг фойда ва барқарорлик тўғрисидаги қоидаларини бузган.
Ундан ташқари, 2018 йилнинг декабрь ойидан ҳозирга қадар гарчи Премьер Лига қоидалари шуни талаб қилса-да, “Манчестер Сити” ўз текширувларида Премьер Лига билан ҳамкорлик қилмаган ва керакли ҳужжатларни тақдим этмаган.
Ушбу айбловлар бўйича суд жараёни махфий ва ёпиқ тарзда ўтказилмоқда.
Изоҳ (0)