Покистон собиқ президенти Парвез Мушарраф 79 ёшида Дубайдаги касалхонада вафот этди, деб хабар бермоқда The Guardian.
Сўнгги йилларда Бирлашган Араб Амирликларида қувғинликда яшаган Мушарраф организмда оқсил алмашинувининг бузилиши билан боғлиқ кам учрайдиган амилоидоз касаллигидан даволаниб келаётганди.
Покистон Мудофаа вазирлиги собиқ президентнинг вафоти муносабати билан ҳамдардлик билдирди.
Парвез Мушарраф Покистонда 1999 йилда ҳарбий тўнтариш натижасида ҳокимият тепасига келганди. У 2001—2008 йилларда мамлакат президенти лавозимида ишлаган.
2013 йилда Покистон ҳукумати ташаббуси билан Мушаррафга нисбатан жиноий иш очилди. У 2007 йилда Олий суд Мушаррафнинг янги муддатга қайта сайланиши қонуний ёки йўқлигини текшириш тўғрисида қарор чиқарган пайтда мамлакатда фавқулодда ҳолат жорий этиб, конституцияни тўхтатиб тургани учун давлатга хиёнатда айбланган. 2019 йил охирида Мушарраф сиртдан ўлим жазосига ҳукм этилган, бироқ бир ой ўтиб ҳукм бекор қилинган.
2016 йилдан бери Парвез Мушарраф Дубайда истиқомат қилиб келаётганди. Касаллик фонида у ватанига қайтишни исташи ҳақида айтган.
Изоҳ (0)