Исроил собиқ бош вазири Нафтали Беннет уруш бошида Владимир Путин унга Украина президенти Владимир Зеленскийни ўлдирмасликка ваъда бергани ҳақида айтиб берди. Бу ҳақда The Jerusalem Post хабар бермоқда.
2021—2022 йилларда Исроил ҳукуматини бошқарган Беннет “12-канал”га берган интервьюсида 2022 йил март ойида Москвага келганида Россия президенти билан бу масалани муҳокама қилганини айтди. Собиқ бош вазирнинг сўзларига кўра, у Путинга Украина президентининг ўлдирилиши борасида тўғридан тўғри савол берган, Путин эса “Мен Зеленскийни ўлдирмоқчи эмасман”, деб жавоб қайтарган. Сўнг Беннет Россия президентидан бундай қилмасликка сўз беришни сўраган, Путин Зеленскийни ўлдириш нияти йўқлигини такрорлаган.
Учрашувдан сўнг Беннет ўша пайтда махфий бункерда яширинган Зеленскийга қўнғироқ қилиб, унга хавф йўқлигини айтган. Бир неча соатдан сўнг Украина президенти ўз кабинетида ўтиргани акс этган видеони эълон қилди, дейди Беннет.
Исроил собиқ бош вазири ўшанда унинг барча ҳаракатлари АҚШ, Германия ва Франция билан келишилганини қўшимча қилди.
2022 йил март ойида Британиянинг The Times газетаси Владимир Зеленский бир ҳафта ичида камида учта суиқасддан омон қолгани ҳақида хабар берганди. Нашр маълумотларига кўра, Украина президентини ўлдириш топшириғи билан мамлакатга икки гуруҳ – “Вагнер” ёлланма аскарлари ва чечен махсус бўлинмалари келган, бироқ уларнинг режалари Россия Федерал хавсизлик хизматининг урушга қарши зобитлари томонидан барбод этилган. 2023 йил январь ойида Россиянинг Украинага босқини бошланганидан бери Зеленский 12 тадан ортиқ суиқасддан омон қолгани, улардан баъзиларининг олдини олишга Америка Марказий разведка бошқармаси ёрдам бергани хабар қилинганди.
Изоҳ (0)