“Сал нотўғри гапирсанг, оёғости қилишга уринишади” — Юлдуз Усмонова гап-сўзлардан чарчагани, хит қўшиқлар яратишнинг сирлари ҳақида (видео)

Айни кунларда хонанда Юлдуз Усмонова бу йилги яккахон концерт дастурига жиддий тайёргарлик кўряпти. “Дарё” мухбирлари тайёргарлик жараёнларини кузатиб, хонанда билан суҳбатда бўлишди. Юлдуз Усмонова бу йилги концертнинг ўзига хос жиҳатлари нимада эканлиги ҳақидаги саволга қуйидагича жавоб берди. 

— Дастурнинг икки блоки фақат янги қўшиқлардан тузилган. Битта блокда эса халқ соғинган ретро қўшиқларни куйлашга қарор қилдик. Ўтган йили ретро қўшиқлар учун алоҳида концерт бергандим. Аммо анча чарчатиб, барчамизни “тўкиб” қўйди. Ретро қўшиқлар қанчалик севимли бўлмасин, барибир мухлислар янги тароналарни кутишади. 
Концертда “ҳазм қилиш” осон бўлиши учун ҳар ҳафта премерасини ўтказиб боряпмиз. Ишонаманки, бу қўшиқлар ҳам кун келиб ретро бўлади. Чунки бугун экилган уруғ сабаб улар яшайди. 

Хонанда ортиқча гап-сўзлардан чарчагани ва битта нотўғри гапи сабаб аввалги меҳнатларини унутиб юборишлари ҳақида гапирди.

— Ёшликда куч-қувватинг борида унга у, бунга бу деб, олишиб юравераркансан. Аммо кейинчалик эътибор қилмай ҳам қўяркансан. Инсон худди карвондан кўзлаган манзили сари ҳаракат қилавериши керак экан. Ортингдан гапирадиганлар эса кўппакдек бўкириб қолаверади. Санъаткор, аввало, Аллоҳга, ундан кейин меҳнати ва ўзидан бошқа ҳеч кимга суянолмайди. 
Сал нотўғри гапирсанг, шунча қилган меҳнатларинг ўчирилиб, оёғости қилишга уринишади. Аммо буни халқ қилмайди, суриштириб борсанг, баъзи ҳамкасбларингнинг хизмати бўлади. Баъзи интернетда ўтирадиган санъаткорлар бошқасини оёғости қилишдан қўрқмайди. Инсон иши ва бола-чақаси билан овора бўлса, биров ҳақида гапиришга ҳам вақти бўлмайди. Масалан, қизим Нилуфар Усмонова. Бешта бола билан бўлиб уйида ўтириб бемалол нон ейишга ҳам вақти йўқ. 

Аслида инсон ўз ишини билиб қилса, ортиқча гап-сўзларга ҳам вақти бўлмайди. Ўзининг ишини қилмайди-да, “Мени ўлдирмоқчи, ундай-бундай қилмоқчи”, деб гап-сўз тарқатади. Бино қўйиш санъаткорга эмас. Шундай қилиб ўтирса, ўзига ёмон. 
Мухлис фақат бир санъаткорга қарсак чалишга мажбур эмас. Бугун мени, эртага бошқа хонандани олқишлаши ҳам табиий, — дейди хонанда.

Сўнгги йилларда фақат хит тароналарни ижро этаётган хонанда бунинг сири нимада эканлигини айтиб ўтди. 

— Шу кунгача жуда кўп бастакорлар билан ишладим. Ўзимнинг қўшиқларим жуда оғир, мен эса қўшиқлар ранг-баранг бўлишини истайман. Бастакорлардан қўшиқларни сотиб олиб, бирга ишлаймиз. Ёш бастакорларнинг кўпи қўшиқларимдан илҳом олади. Аммо янги ижод аввалгисига ўхшамайди. Чунки у янги қўшиқни ўз олами билан яратган бўлади. Ёш бастакорлар билан ҳам ишлайман. Шаҳбоз, Малик ва Темур билан яратган қўшиқларим ҳам хит даражасига чиқди.
Ўрни келганида айтиб олай, бастакорлар билан гаплашсангиз, олам-олам дардларини эшитасиз. Машина олиб беришни ваъда қилади ёки 4 000 АҚШ долларига концерт қўшиқларини ёзиб беришни келишишади, аммо охирида 400 АҚШ долларини беради. 

Бастакорлик ҳам осон эмас. Улар кўчага чиқмай, ертўлада ўтириб, қўшиқ устида ишлайди. Уларнинг “нони”, оиласининг тирикчилиги ҳам ана шу ишдан. Аммо баъзи хонандалар чиройли кўйлак кийиб, халқ ичида ўша қўшиқларни айтаётганда бастакор ва мусиқий безакчиларнинг ҳам меҳнатини унутмаслиги керак. 
Шоирлар билан ҳам тенгма-тенг ишлайман. Яхши шеър ёзадиганлар кўп, аммо уни айтсам баъзан ўзимга ёқмайди. Ўзгартириш киритиш кераклигини айтсам, хафа бўлиб қолишади. Қўшиқ шеъри чиройли сўзларни терган билан ёзилиб қолмайди. “Бор, уйингда ёзиб кел” демай, ишларимни бир четга суриб шоир билан ишлайман. Аллоҳим ҳам барокат бирликда дейди. Хонанда кибр қилиб ўтирса, хитар яралмайди, — дейди хонанда Юлдуз Усмонова.

Қуйида видеони тўлиқ томоша қилишингиз мумкин.