“Sal noto‘g‘ri gapirsang, oyog‘osti qilishga urinishadi” — Yulduz Usmonova gap-so‘zlardan charchagani, xit qo‘shiqlar yaratishning sirlari haqida (video)

Ayni kunlarda xonanda Yulduz Usmonova bu yilgi yakkaxon konsert dasturiga jiddiy tayyorgarlik ko‘ryapti. “Daryo” muxbirlari tayyorgarlik jarayonlarini kuzatib, xonanda bilan suhbatda bo‘lishdi. Yulduz Usmonova bu yilgi konsertning o‘ziga xos jihatlari nimada ekanligi haqidagi savolga quyidagicha javob berdi. 

— Dasturning ikki bloki faqat yangi qo‘shiqlardan tuzilgan. Bitta blokda esa xalq sog‘ingan retro qo‘shiqlarni kuylashga qaror qildik. O‘tgan yili retro qo‘shiqlar uchun alohida konsert bergandim. Ammo ancha charchatib, barchamizni “to‘kib” qo‘ydi. Retro qo‘shiqlar qanchalik sevimli bo‘lmasin, baribir muxlislar yangi taronalarni kutishadi. 
Konsertda “hazm qilish” oson bo‘lishi uchun har hafta premyerasini o‘tkazib boryapmiz. Ishonamanki, bu qo‘shiqlar ham kun kelib retro bo‘ladi. Chunki bugun ekilgan urug‘ sabab ular yashaydi. 

Xonanda ortiqcha gap-so‘zlardan charchagani va bitta noto‘g‘ri gapi sabab avvalgi mehnatlarini unutib yuborishlari haqida gapirdi.

— Yoshlikda kuch-quvvating borida unga u, bunga bu deb, olishib yuraverarkansan. Ammo keyinchalik eʼtibor qilmay ham qo‘yarkansan. Inson xuddi karvondan ko‘zlagan manzili sari harakat qilaverishi kerak ekan. Ortingdan gapiradiganlar esa ko‘ppakdek bo‘kirib qolaveradi. Sanʼatkor, avvalo, Allohga, undan keyin mehnati va o‘zidan boshqa hech kimga suyanolmaydi. 
Sal noto‘g‘ri gapirsang, shuncha qilgan mehnatlaring o‘chirilib, oyog‘osti qilishga urinishadi. Ammo buni xalq qilmaydi, surishtirib borsang, baʼzi hamkasblaringning xizmati bo‘ladi. Baʼzi internetda o‘tiradigan sanʼatkorlar boshqasini oyog‘osti qilishdan qo‘rqmaydi. Inson ishi va bola-chaqasi bilan ovora bo‘lsa, birov haqida gapirishga ham vaqti bo‘lmaydi. Masalan, qizim Nilufar Usmonova. Beshta bola bilan bo‘lib uyida o‘tirib bemalol non yeyishga ham vaqti yo‘q. 

Aslida inson o‘z ishini bilib qilsa, ortiqcha gap-so‘zlarga ham vaqti bo‘lmaydi. O‘zining ishini qilmaydi-da, “Meni o‘ldirmoqchi, unday-bunday qilmoqchi”, deb gap-so‘z tarqatadi. Bino qo‘yish sanʼatkorga emas. Shunday qilib o‘tirsa, o‘ziga yomon. 
Muxlis faqat bir sanʼatkorga qarsak chalishga majbur emas. Bugun meni, ertaga boshqa xonandani olqishlashi ham tabiiy, — deydi xonanda.

So‘nggi yillarda faqat xit taronalarni ijro etayotgan xonanda buning siri nimada ekanligini aytib o‘tdi. 

— Shu kungacha juda ko‘p bastakorlar bilan ishladim. O‘zimning qo‘shiqlarim juda og‘ir, men esa qo‘shiqlar rang-barang bo‘lishini istayman. Bastakorlardan qo‘shiqlarni sotib olib, birga ishlaymiz. Yosh bastakorlarning ko‘pi qo‘shiqlarimdan ilhom oladi. Ammo yangi ijod avvalgisiga o‘xshamaydi. Chunki u yangi qo‘shiqni o‘z olami bilan yaratgan bo‘ladi. Yosh bastakorlar bilan ham ishlayman. Shahboz, Malik va Temur bilan yaratgan qo‘shiqlarim ham xit darajasiga chiqdi.
O‘rni kelganida aytib olay, bastakorlar bilan gaplashsangiz, olam-olam dardlarini eshitasiz. Mashina olib berishni vaʼda qiladi yoki 4 000 AQSH dollariga konsert qo‘shiqlarini yozib berishni kelishishadi, ammo oxirida 400 AQSH dollarini beradi. 

Bastakorlik ham oson emas. Ular ko‘chaga chiqmay, yerto‘lada o‘tirib, qo‘shiq ustida ishlaydi. Ularning “noni”, oilasining tirikchiligi ham ana shu ishdan. Ammo baʼzi xonandalar chiroyli ko‘ylak kiyib, xalq ichida o‘sha qo‘shiqlarni aytayotganda bastakor va musiqiy bezakchilarning ham mehnatini unutmasligi kerak. 
Shoirlar bilan ham tengma-teng ishlayman. Yaxshi sheʼr yozadiganlar ko‘p, ammo uni aytsam baʼzan o‘zimga yoqmaydi. O‘zgartirish kiritish kerakligini aytsam, xafa bo‘lib qolishadi. Qo‘shiq sheʼri chiroyli so‘zlarni tergan bilan yozilib qolmaydi. “Bor, uyingda yozib kel” demay, ishlarimni bir chetga surib shoir bilan ishlayman. Allohim ham barokat birlikda deydi. Xonanda kibr qilib o‘tirsa, xitar yaralmaydi, — deydi xonanda Yulduz Usmonova.

Quyida videoni to‘liq tomosha qilishingiz mumkin.