“Уйда газ-свет йўқлиги, хоналар совиб кетгани учун кўчада ўт ёқиб, исиндик”. Янги Наманган аҳолиси ҳудудда қиш мавсумига тайёргарлик йўқлигидан шикоят қилди

Ижтимоий тармоқларда Наманган вилоятининг Янги Наманган туманида аҳоли кўчада олов ёқиб исинаётгани, хонадонларида газ ва электр таъминотида узилишлар бўлгани сабаб одамлар шунга мажбур бўлганини айтиб, чиқиш қилган видео тарқалди. “Дарё” мухбири воқеа содир бўлган ҳудудда бўлди.

Маълум бўлишича, воқеа Янги Наманган туманининг “Маънавият” маҳалласидаги кўп қаватли уйлар олдида содир бўлган.

Кеча уйларимизда уч соатдан кўп вақт давомида газ ва свет бўлмади. Уйлар совиб кетгани учун кўчага чиқиб, ўтин ёқиб исиндик. Ҳамма кўчада экан. Уйда болалар совуқдан қотиб қолгани учун ҳам сал бўлса-да, исинамиз деб, кўчага чиқиб олов ёқдик. Олов ёққанимиздан сўнг ҳамма масъуллар шу ерга етиб келди. Аввал телефон қилган пайтимиз жавоб ҳам бермаган раҳбарлар оловни кўриб, чопиб келишди. “Участкавой”, маҳалла раиси ва электр тармоқлари корхонаси раҳбарлари ҳам келишди, — дейди олов ёқиб исинган фуқаролардан бири Анваржон Исоқов.

Янги Наманган тумани электр тармоқлари корхонаси муҳандиси Сардорбек Ғаффаров кўп қаватли уйда электр таъминотида узилиш бўлганини тасдиқлади.

Мазкур маҳалладаги 3-домда электр токида юзага келган носозликни бартараф этгунимизга қадар 5-домдаги аҳоли электр токисиз қолган ва шу ҳолат келиб чиққан. Бу муаммони тезда бартараф қилишга уриндик ва қисқа фурсатда 3- ва 5-дом аҳолисини электр токи билан таъминладик, — дейди Янги Наманган тумани электр тармоқлари корхонаси муҳандиси Сардорбек Ғаффаров.

Масъулнинг қўшимча қилишича, кўп қаватли уйлардаги электр токида юзага келган носозлик юклама ортишидан келиб чиққан.

Кунлар совиб кетгани, қолаверса, кўп қаватли уйлардаги газ таъминотининг етарлича бўлмагани электр токига эҳтиёж ортишига, юклама кўпайиб кетиб, ўчиш ҳолати рўй беришига олиб келган, — дейди масъул.

“Тонг соат 5:30 да свет ўчди. Ёнмади. Ёрдам чақирсак, мана кетди, ана кетди деб алдашди. Ҳеч ким келмади. Кекса ёшли бўлганимиз учун совуқ ўтиб, қалтириб қолдик. Ҳозир ҳам шу аҳволдамиз. Шу сабаб болалар олов ёқишди, биз исиндик”, — дейди кўп қаватли уйда яшовчи Манзура Тўлаганова.

Яна бир фуқаро Ҳаётхон Ботирова республика бўйлаб муаммо бўлаётган газ масаласини тўғри тушунишларини, аммо электр токининг йўқлиги уларни қийнаб қўйганини айтмоқда.

Газ йўқлигини тушундик. Бу республика бўйлаб муаммо экан. Аммо сўнгги кунларда фақат биз яшовчи “дом”да свет ҳам ўчиб қолди. Бошқа кўп қаватли уйларда свет бор экан. Фақат бизда ўчиши уйдагиларни, болаларни қийнаб қўйди. Свет ўчганидан кейин барча масъулларга қўнғироқ қилиб, ёрдам сўрадик. Лекин ҳеч ким келмади. Шундан сўнг шу ерда олов ёқиб, исиндик. Шундан кейин чақирган одамларимиз келиб, муаммони тўғрилаб беришди, — дейди Ҳаётхон Ботирова.

Суҳбатдошнинг айтишича, бу муаммо 80-90 та хонадон вакилларини қийнаб қўйган.

Ўша куни ҳаммада свет бор эди. Фақат бизда йўқ эди. Шу сабаб олов ёқишга мажбур бўлдик, — дейди Анваржон Исоқов.