Ўзбекистон ва Қирғизистон ўртасидаги савдо айланмасини 2 млрд долларга етказиш режалаштирилмоқда

Ўзбекистон ва Қирғизистон ўртасидаги савдо айланмасини 2 мллиард долларга етказиш режалаштирилмоқда. Бу ҳақда Қирғизистон Савдо-саноат палатаси президенти Темир Сариев 26 январь куни Бишкекда бўлиб ўтган Қирғизистон—Ўзбекистон бизнес-форумида айтиб ўтди.

У Ўзбекистон томони раҳбарияти ва ишбилармон доиралар вакилларидан ҳамкорлик бўйича йирик лойиҳаларни амалга ошириш истаги борлигини эшитишдан мамнун бўлганини билдириб ўтди. Ўзбекистонда импорт ўрнини босишга, хориждан эмас, Қирғизистондан маҳсулотларни олиб келишга ҳам қизиқиш билдирилаётганини қайд этди.

“Бугун бу масала билан боғлиқ рақамлар ҳам эълон қилинди. Қирғизистон чет давлатлардан қарийб 800 миллион долларлик маҳсулот харид қилади. Худди шундай маҳсулотлар Ўзбекистонда ҳам ишлаб чиқарилади. Бу масала ҳал этилса, Ўзбекистон ва Қирғизистон ўртасидаги ҳамкорлик янги босқичга кўтарилади. Шу боис бугунги бизнес-форумда айтилганидек, бизнинг стратегик вазифамиз — кооперация ва яқин ҳамкорликнинг янги даражасига кўтарилишдир”, — дейди Темир Сариев.

Унинг таъкидлашича, бу ҳар икки мамлакатларда фаровонлик ошишига, ўзаро муносабатлар яна яхшиланишига, биродар халқлар ҳамжиҳатликда яшашига олиб келади.

Темир Сариев Хитой—Қирғизистон—Ўзбекистон темир йўли қурилиши аҳамиятига ҳам тўхталиб ўтди.

“Бизнес ушбу лойиҳа амалга оширилишини қўллаб-қувватлайди. Бу XXI асрнинг энг йирик лойиҳаларидан бири бўлади деб ўйлайман. Ушбу лойиҳа Ўзбекистонга ҳам керак. Асосийси, Қирғизистон ҳам, Ўзбекистон ҳам транзит мамлакатларга айлана олади. Улар денгиз портларига ҳам чиқиш имкониятига эга бўлади, бу эса Ғарб билан Шарқни, Жануб билан Шимолни янада боғлайди”, — дейди у.

Унинг айтишича, ушбу темир йўл қурилиши бўйича биринчи техник-иқтисодий асос жорий йилнинг ўрталарида тайёр бўлиши кутилмоқда, қурилиш ишларига эса  2023 йил охири ёки 2024 йил бошларида старт берилиши кутилмоқда.

“Темир йўл қурилса, бизнинг иқтисодий, савдо-сотиқ, логистика ва транспорт имкониятларимиз бир неча баробар ошади, шунингдек, мамлакатларимизга транзит ташиш орқали даромад олиш имкониятини беради”, — дейди Қирғизистон Савдо-саноат палатаси президенти.