Кейт Уинслет бутун фаолияти давомида қоматини танқид қилишларидан азият чеккан актрисалардан бири. Актриса қандай қилиб танқид билан курашишни ўргангани ва нима учун ёқимсиз таблоид сарлавҳаларига эътибор беришни тўхтатгани ҳақида маълумот берамиз.
Кейт биринчи марта актрисалик фаолиятини бошлаганда бодишейминг (гавда тузилишидан уялиш)га дуч келади. Актёрларни танлаш учун масъул одамлар доимо унинг агенти билан боғланиб, қизнинг вазни қанча эканлигини сўрашарди. Унинг сўзларига кўра, атрофидагилар қизнинг омадли карьера қура олишига ишонишмаган, фақатгина тўладан келган қизлар ролини ўйнайди, деб ҳисоблашган.
Ўсмирлик даврида Кейт қомати ва вазни туфайли кўплаб роллардан воз кечган. “Tитаник” блокбастерида роль ўйнаган бўлса ҳам, ўз ижросидан кўнгли тўлмайди. Голливудда, унинг сўзларига кўра, ҳамма қандайдир жуда нозик эди, у эса бу стандартларга мос келмасди.
“Tитаник” фильми чиққанидан сўнг актриса бир қанча ёмон изоҳларга ҳам дуч келади. Таблоидлар, агар Роуз бир неча килога озғин бўлганда, Жек ҳам эшик бўлагига сиғиши ва ўлмаслиги мумкинлигини ҳазил қилишади. Кейинчалик актриса нега атрофдагилар уни семиз дейишганини умуман тушунмаганини айтади, чунки у ўша пайтда ҳам семиз эмасди. “Одамлар мен жуда семиз бўлганим учун Лео тахтага сиғмай ҳалок бўлди, дейишган. Нега улар мени шунчалик ёмон кўришган?”, — деб эслайди у.
Ўша пайтда актриса танқидларга эътиборсиз бўлолмаган. Оғир сўзлар унинг ўзига бўлган ишончига путур етказади.
Бироқ юлдузнинг машҳурлиги ва ўзига бўлган ишончи йилдан йилга ортиб борди. 2000 йилда, қизи туғилгандан сўнг, Кейт қомати ҳақида ташвишланишни тўхтатди.
2016 йилда берган интервьюсида у фақат битта ҳаёти борлигини ва уни бошқаларнинг кўзига қандай кўриниши ҳақида қайғуриш билан ўтказмоқчи эмаслигини айтади. “Аёллар фақатгина қандай қилиб бахтли бўлишлари ва улар аслида ким эканлигига эътибор қаратишлари керак”, — дея қўшимча қилади у.
Фаолияти давомида Кейт бу сўзларини бир неча бор амалда ҳам исботлаган ва доимий равишда директор ҳамда реклама берувчилар билан тўқнаш келган. У бир неча бор таблоидларни туҳмат учун судга беради, фотосуратлари ва видеоларини ретуш қилишни тақиқлайди. Актриса, шунингдек, “Исттаунлик Мейр” сериалидаги роли учун принципиал жиҳатдан озмаганини, аксинча, иложи борича орттирган вазнини ҳам сақлаб қолганини айтади.
“Болалигимда ҳеч бир аёлнинг мен танамни яхши кўраман, деганини эшитмаганман. Онам ҳам, опам ҳам, дугоналарим ҳам бундай дейишмаган. Ҳеч бир аёл ҳеч қачон мен ўз танам билан фахрланаман, деб айтмаган. Шунинг учун мен буни қизим Миага, албатта, айтаман. Тана билан соғлом муносабатлар эрта ёшдан шаклланиши муҳим”, — дейди актриса.
Актриса уч фарзандни дунёга келтирган. Сўнгги ҳомиладорлигида у тез-тез омма олдида пайдо бўлиб, юмалоқ қорин билан завқ билан суратга тушди. Кўриниб турибдики, Кейт вазни қанча бўлишидан қатъи назар, ўзини ва қоматини яхши кўради.
“Тўғрисини айтсам, танишларим орасида XS ўлчамдаги одам йўқ. Йўқ, кечирасиз, битта бор экан: қизим. У 11 ёшда. Миямдаги мен семизман деган стереотипдан халос бўлиш учун менга кўп вақт керак бўлди”, — дейди у интервьюсида. Аммо шундай қоматга эга бўлганидан миннатдор эканини ҳам қўшимча қилади.
Уинслетнинг фикрича, пластик жарроҳлик ва имплантлар фақат ўзини яхши ҳис қилишига ишонадиган одамлар учундир. Аммо буларнинг барчаси актрисалар учун унчалик муҳим эмас. “Актёрлик бу — ҳалол бўлишдан иборат”, — дейди юлдуз.
Эмма Томсон ҳатто бир марта Кейтга, агар у омма манфаати учун вазн йўқотса, у билан бошқа ҳеч қачон гаплашмаслигини айтади.
Ҳозирда ишонч билан айтиш мумкинки, ҳеч ким юлдузни қомати учун танқид қилишга журъат эта олмайди. Агар илгари у вазни туфайли рад этилиши мумкин бўлса, энди Кейтнинг ўзи ролларга “буюртма беради”. “У йилига юзлаб таклифлар олади, аммо 2-3 тасини танлайди, холос”, — дейди продюсерлар.
Кейт ўтмишда у ҳақда ёзилган танқидий мақолаларни ҳозир табассум билан ўқийди — улар энди уни хафа қилмайди. “Ҳозир ҳаммаси бошқача”, — дейди актриса.
Изоҳ (0)