Keyt Uinslet butun faoliyati davomida qomatini tanqid qilishlaridan aziyat chekkan aktrisalardan biri. Aktrisa qanday qilib tanqid bilan kurashishni o‘rgangani va nima uchun yoqimsiz tabloid sarlavhalariga e’tibor berishni to‘xtatgani haqida ma’lumot beramiz.
Keyt birinchi marta aktrisalik faoliyatini boshlaganda bodisheyming (gavda tuzilishidan uyalish)ga duch keladi. Aktyorlarni tanlash uchun mas’ul odamlar doimo uning agenti bilan bog‘lanib, qizning vazni qancha ekanligini so‘rashardi. Uning so‘zlariga ko‘ra, atrofidagilar qizning omadli karyera qura olishiga ishonishmagan, faqatgina to‘ladan kelgan qizlar rolini o‘ynaydi, deb hisoblashgan.
O‘smirlik davrida Keyt qomati va vazni tufayli ko‘plab rollardan voz kechgan. “Titanik” blokbasterida rol o‘ynagan bo‘lsa ham, o‘z ijrosidan ko‘ngli to‘lmaydi. Gollivudda, uning so‘zlariga ko‘ra, hamma qandaydir juda nozik edi, u esa bu standartlarga mos kelmasdi.
“Titanik” filmi chiqqanidan so‘ng aktrisa bir qancha yomon izohlarga ham duch keladi. Tabloidlar, agar Rouz bir necha kiloga ozg‘in bo‘lganda, Jek ham eshik bo‘lagiga sig‘ishi va o‘lmasligi mumkinligini hazil qilishadi. Keyinchalik aktrisa nega atrofdagilar uni semiz deyishganini umuman tushunmaganini aytadi, chunki u o‘sha paytda ham semiz emasdi. “Odamlar men juda semiz bo‘lganim uchun Leo taxtaga sig‘may halok bo‘ldi, deyishgan. Nega ular meni shunchalik yomon ko‘rishgan?”, — deb eslaydi u.
O‘sha paytda aktrisa tanqidlarga e’tiborsiz bo‘lolmagan. Og‘ir so‘zlar uning o‘ziga bo‘lgan ishonchiga putur yetkazadi.
Biroq yulduzning mashhurligi va o‘ziga bo‘lgan ishonchi yildan yilga ortib bordi. 2000-yilda, qizi tug‘ilgandan so‘ng, Keyt qomati haqida tashvishlanishni to‘xtatdi.
2016-yilda bergan intervyusida u faqat bitta hayoti borligini va uni boshqalarning ko‘ziga qanday ko‘rinishi haqida qayg‘urish bilan o‘tkazmoqchi emasligini aytadi. “Ayollar faqatgina qanday qilib baxtli bo‘lishlari va ular aslida kim ekanligiga e’tibor qaratishlari kerak”, — deya qo‘shimcha qiladi u.
Faoliyati davomida Keyt bu so‘zlarini bir necha bor amalda ham isbotlagan va doimiy ravishda direktor hamda reklama beruvchilar bilan to‘qnash kelgan. U bir necha bor tabloidlarni tuhmat uchun sudga beradi, fotosuratlari va videolarini retush qilishni taqiqlaydi. Aktrisa, shuningdek, “Isttaunlik Meyr” serialidagi roli uchun prinsipial jihatdan ozmaganini, aksincha, iloji boricha orttirgan vaznini ham saqlab qolganini aytadi.
“Bolaligimda hech bir ayolning men tanamni yaxshi ko‘raman, deganini eshitmaganman. Onam ham, opam ham, dugonalarim ham bunday deyishmagan. Hech bir ayol hech qachon men o‘z tanam bilan faxrlanaman, deb aytmagan. Shuning uchun men buni qizim Miaga, albatta, aytaman. Tana bilan sog‘lom munosabatlar erta yoshdan shakllanishi muhim”, — deydi aktrisa.
Aktrisa uch farzandni dunyoga keltirgan. So‘nggi homiladorligida u tez-tez omma oldida paydo bo‘lib, yumaloq qorin bilan zavq bilan suratga tushdi. Ko‘rinib turibdiki, Keyt vazni qancha bo‘lishidan qat’i nazar, o‘zini va qomatini yaxshi ko‘radi.
“To‘g‘risini aytsam, tanishlarim orasida XS o‘lchamdagi odam yo‘q. Yo‘q, kechirasiz, bitta bor ekan: qizim. U 11 yoshda. Miyamdagi men semizman degan stereotipdan xalos bo‘lish uchun menga ko‘p vaqt kerak bo‘ldi”, — deydi u intervyusida. Ammo shunday qomatga ega bo‘lganidan minnatdor ekanini ham qo‘shimcha qiladi.
Uinsletning fikricha, plastik jarrohlik va implantlar faqat o‘zini yaxshi his qilishiga ishonadigan odamlar uchundir. Ammo bularning barchasi aktrisalar uchun unchalik muhim emas. “Aktyorlik bu — halol bo‘lishdan iborat”, — deydi yulduz.
Emma Tomson hatto bir marta Keytga, agar u omma manfaati uchun vazn yo‘qotsa, u bilan boshqa hech qachon gaplashmasligini aytadi.
Hozirda ishonch bilan aytish mumkinki, hech kim yulduzni qomati uchun tanqid qilishga jur’at eta olmaydi. Agar ilgari u vazni tufayli rad etilishi mumkin bo‘lsa, endi Keytning o‘zi rollarga “buyurtma beradi”. “U yiliga yuzlab takliflar oladi, ammo 2-3 tasini tanlaydi, xolos”, — deydi prodyuserlar.
Keyt o‘tmishda u haqda yozilgan tanqidiy maqolalarni hozir tabassum bilan o‘qiydi — ular endi uni xafa qilmaydi. “Hozir hammasi boshqacha”, — deydi aktrisa.
Izoh (0)