Ғузор тумани ҳокими Туркманистон билан чегарадош қишлоқда бўлиб, бир кеча тунаб қолди

Ғузор тумани ҳокими Бекзод Суюнов Туркманистон давлати билан чегарадош ва туман марказидан 70 километр узоқликда жойлашган “Қоракўл” маҳалласининг Жанқара қишлоғида бўлиб, аҳоли муаммоларини ўрганиш учун шу қишлоқдаги хонадонларнинг бирида тунаб қолди. Бу ҳақда “Дарё”га туман ҳокимлиги ахборот хизмати раҳбари Худойберди Йўлдошев маълум қилди.

“Аҳоли муаммоларини маҳалланинг ўзига бориб ўрганиш биз раҳбарлар олдига қўйилган асосий вазифа. Лекин олис қишлоқда бир неча соат бўлиш, бу — аҳоли муаммоларини ўрганиш учун етарли эмаслиги ҳаммага маълум. Шу сабабли, бир кеча ушбу қишлоқда қолиб, аҳоли айниқса, ёшларнинг дарду-ташвишларини тинглашни лозим топдим”, — дейди ҳоким Бекзод Суюнов.

Ҳокимнинг сайёр қабулида қишлоқ аҳлининг электр энергияси таъминотини яхшилаш, ички йўлларни таъмирлаш, ичимлик суви ва суюлтирилган газ баллонларни ўз вақтида етказиб бериш ҳамда тиббий хизматни яхшилаш каби масалалардаги мурожаатлари тингланган.

“Билдирилган мурожаатларни қонуний ҳал этиш учун мутасадди ташкилотларга кўрсатмалар берилиб, ижроси назоратга олинди. Олис қишлоқ аҳолисининг мурожаатларига ижобий ечим топилди”, — дейди ҳокимлик ахборот хизмати раҳбари Худойберди Йўлдошев.

Ҳокимнинг қишлоққа ташрифи давомида дошқозонларда ош дамланган. Туман ҳокимининг аҳоли билан суҳбати бир пиёла чой устида давом этган.

“Туман ҳокими сайёр қабулдан сўнг, қишлоқда жойлашган 25-сонли умумтаълим мактаби ва қишлоқ оилавий поликлиникасини ҳам кўздан кечирди. Мактабнинг иситиш тизими, ўқувчиларнинг бўш вақтларини мазмунли ўтказиш мақсадида қилинган шароитлар ҳамда мактабнинг ахборот технологиялари билан таъминланганлик даражасини ўрганди. Қишлоқ оилавий поликлиникасининг тиббий хизмат кўрсатиш ҳолати билан қизиқди. Шунингдек, туман ҳокими ижтимоий соҳа объектларидаги шарт-шароитлари билан танишар экан, келажак авлод вакилларининг сифатли таълим олишида, тиббий хизмат кўрсатишни яхшилаш учун барча бирдек масъул эканлигини таъкидлади”, — дейди ҳокимлик вакили.

Туман ҳокимининг олис қишлоққа ташрифи давомида, шунингдек эҳтиёжманд оилалар ва кексалар ҳолидан ҳам хабар олинган.