Цемент нархи пасайди: Ўзбекистон биржасида ўтган ҳафтадаги вазият қандай бўлди?

Ўтган ҳафта давомида яъни 16—22 январь кунлари Ўзбекистон Товар-хом ашё биржасининг барча савдо платформаларида 1,99 трлн сўмлик товарлар сотилган бўлиб, бу аввалги ҳафтага нисбатан 7 фоизга камдир. Бу ҳақда биржа матбуот хизмати хабар берди.

Бунда сотувларнинг

• 92,9 фоизи — биржа савдолари;
• 0,1 фоизи — кўргазма-ярмарка савдолари;
• 6,7 фоизи — электрон давлат харидлари;
• 0,3 фоизи — авторақамларнинг онлайн-аукционига тўғри келди.

Кичик бизнес ва хусусий тадбиркорлик субъектлари иштирокида тузилган битимларнинг умумий ҳажми 616,8 млрд сўмни ташкил қилди. Давлат харидлари тизимларида ўтказилган электрон савдолар натижасида бюджет ва корпоратив буюртмачиларининг қарийб 35,6 млрд сўмлик маблағлари тежалди.

Кўриб чиқилаётган давр мобайнида онлайн аукцион орқали 1 692 та авторақамлар сотилди, сотилган давлат рақам белгиларининг умумий суммаси 6,5 млрд сўмни ташкил қилди.

Рақобатли савдолар натижасида битимларнинг

• 3,7 фоизи — биринчи тоифадаги авторақамларга;
• 9,2 фоизи — иккинчи тоифадаги авторақамларга;
• 11,1 фоизи — учинчи тоифадаги авторақамларга;
• 13,1 фоизи — тўртинчи тоифадаги авторақамларга;
• 20,5 фоизи — бешинчи тоифадаги авторақамларга;
• 42,4 фоизи — олтинчи тоифа авторақамларга тегишлидир.

Биржа савдолари

Кўриб чиқилаётган даврда очиқ биржа савдолари орқали жами 1,84 трлн сўмлик товар ресурслари сотилди, шу жумладан:

Цемент

Ўтган ҳафта мобайнида биржа савдоларида 35 461 тонна цемент сотилди. Ўртача кунлик сотув ҳажмлари 7,1 минг тоннани ташкил қилди.

Кўриб чиқилаётган даврда цементнинг барча маркалари бўйича шаклланган кунлик ўртача нархлар маҳсулотнинг бир тоннаси учун 604,6 минг сўмдан 599,1 минг сўмгача пасайди. Ўтказилган савдоларда ҳар куни ўртача 20 та харидор иштирок этди.

Калсийланган сода

Ўтган ҳафтада биржа савдоларига 3 500 тонна калсийланган сода қўйилди ва улардан барча ҳажми сотилди. Калсийланган соданинг ўртача кунлик сотув ҳажмлари 700 тоннани ташкил қилди.

Кўриб чиқилаётган даврда калсийланган сода бўйича шаклланган кунлик ўртача нархлар маҳсулотнинг бир тоннаси учун 4,5 млн сўмдан 4,2 млн сўмгача пасайди. Ўтказилган савдоларда ҳар куни ўртача 17 та харидор иштирок этди.

Қора металл прокати

Ўтган ҳафта мобайнида биржа савдоларида 6 573 тонна қора металл сотилди. Ўтказилган савдоларда ҳар куни ўртача 48 та харидор иштирок этди.

Кўриб чиқилаётган даврда қора металл прокатининг ўртача кунлик нархи маҳсулотнинг бир тоннаси учун 8,3 млн сўмдан 8,2 млн сўмгача пасайди.