«Ўшандан бошлаб сочим тўкила бошлади». Ражаб Адашев сочини юлган стюардесса воқеасини гапириб берди (видео)

Ўзбекистон халқ артисти Ражаб Адашев «Дарё» интернет-нашрига эксклюзив интервью берди. Интервьюни «Дарё» мухбири Феруз Муҳаммад ташкиллаштирди.

Ражаб Адашев суҳбат давомида сочи тўкилишига сабаб бўлган қизиқ воқеа ҳақида гапириб берди.

Сочим тўкилганининг кинога халақит берган ёки бермагани ҳақида ҳеч ўйлаб кўрмаган эканман.

Аслида отамда ҳам соч тўкилиши бўлган, бу ота мерос десак ҳам бўлади, лекин менда соч тўкилишининг бошқача тарихи бор.

1973 йилда «Меҳробдан чаён» фильми суратга олиняпти, мен ўша пайтда Ургутда эдим. Кино Хивада олинаётганди ва менинг ролим бор. Хива кўчаларида уч киши юрадиган саҳналар бор, ўшанга бориб тушишим керак. Самарқандга келдим, Урганчга учадиган самолётга ўтирдим. Самолёт тўсатдан Бухорога қўнди. «Бир соатча дам олинглар, ўзимиз чақирамиз» дейишди. Чақирмади. Кейин билсак, қаердандир туристлар келган, уларни бизнинг самолётга чиқаришибди, «Биз-чи?» десак, «Сизларга бошқа самолёт қўйилади» деб айтишди.

«Сумкамни олай» деб самолётга бир амаллаб чиқиб олдим. Сумкамни олдим-да, шартта жойимга ўтириб олдим ва турмадим. Стюардесса чиқишим кераклигини айтяпти, рад этавердим. Жанжал бошланди. Аёл милиция ходимларини чақирди. Иккитаси икки қўлимдан ушлаб судраб олиб чиқа бошлашди. Самолёт эшиги ёнига боргач, икки оёғимни эшикка тираб олдим, «Чиқмайман, чиқмайман» деб бақирдим. Кийимларимдан тортишяпти, йиртилгудек даражада. Шу пайт ҳалиги стюардесса сочимдан чангаллаб ушлаб, торта бошлади. Силтаб тортди, тортди, жоним оғриб, «Бўлди, бўлди, қўйиб юборинг, тушаман» деб уларнинг қўлидан чиқдим. Стюардессанинг қўлида бир тутам сочим қолди. Кейин ўша ердаги милиция бўлимига олиб киришди.

Хуллас, ўшандан бошлаб сочим тўкила бошлади. Орадан бир йил ўтиб, ўрни очилиб қолганди.

Бир нарсага қойил қолиш керакки, режиссёрлар ҳам шу нарсага эътибор беришмаган, қандай бўлсам, шундай қабул қилишган.

Ражаб Адашев, Ўзбекистон халқ артистиМаълумот учун, Ражаб Адашев 1944 йил 15 июль куни Самарқанд вилояти Ургут туманида туғилган. Островский номидаги Тошкент театр ва санъат институтининг актёрлик факультетини тамомлаган. Кинодаги фаолияти 1964 йилдан бошланган. 100 дан ортиқ фильмларда рол ижро этган.

Ражаб Адашев  1993 йилда «Абдуллажон» фильмидаги «Энг яхши эркак роли учун» мукофот, 1997 йилда Ўзбекистонда хизмат кўрсатган артист, 2010 йилда Ўзбекистон халқ артисти, 2021 йилда «Дўстлик» ордени, 2022 йилда Санъат ва маданият фидокори», «Меҳнат фахрийси», «Кинематография фидокори» каби унвон ва мукофотларига муносиб кўрилган.