Россия Марказий сайлов комиссияси 2024 йилнинг март ойида бўлиб ўтадиган президентлик сайловларига тайёргарлик кўришни бошлади. Бу ҳақда мамлакат МСК раҳбари Элла Памфилова маълум қилди.
Памфилованинг сўзларига кўра, ҳозир МСК «президент сайловолди ташвиқотига эътибор қаратган ҳолда» рақамли, услубий, ташкилий ва кадрлар тайёрлаш устида ишламоқда. «Чунки биз ҳозирги шарт-шароитларда президентлик сайловлари қандай ўтишини тушунамиз», — деди Памфилова.
Россияда президентлик сайловлари 2024 йил 17 мартда бўлиб ўтади. Бундан аввал, 2018 йил 7 май куни Владимир Путиннинг тўртинчи президентлик муддати бошланганди. 2020 йилда Россия конституциясига киритилган тузатишларга мувофиқ 2024 йилда Путин яна президентлик учун номзодини қўйиши мумкин. 2021 йил октябрь ойида CNBC билан интервьюда Россия раҳбари келгуси сайловларда иштирок этиш бўйича ҳали бир қарорга келмаганини айтганди.
«Коммерсантъ»нинг президент маъмуриятига яқин манбалари Кремль ички сиёсий блоки Владимир Путиннинг президентлик кампаниясига ҳозирданоқ тайёргарликни бошлагани ҳақида хабар берганди. Манбаларнинг айтишича, яқинда маъмурият вакиллари экспертлар ҳамжамияти билан тегишли маслаҳатлашувлар ўтказган. Ҳозирча тайёргарлик дастлабки хусусиятга эга: мафкуравий таркиб ҳали аниқ шакллантирилгани йўқ, аммо тахминларга кўра, у бирдамлик мавзусига асосланади. Кремль вакиллари 2023 йилги ҳудудий сайловларни диққат билан кузатиб, бўлғуси федерал сайловларда уларнинг тажрибасини ҳисобга олади.
Президент сайловидан аввалги сўнгги ҳудудий сайловлар 2023 йил сентябрига белгиланган, «Коммерсантъ» манбаси айтишича, у анча кўп сонли ҳудудларни ўз ичига олади. Демак, ҳудудий сайловларда ҳам технологик, ҳам мазмуний ғояларни синаб кўриб, сўнг уларни 2024 йилда ҳам қўллаш мумкин бўлади. Бу йил камида 20 та ҳудудда губернаторларнинг тўғридан-тўғри сайловлари, 16 тасида эса қонунчилик мажлисларига сайловлар бўлиб ўтиши керак.
Изоҳ (0)