Ўзбек тиббиёти тарихида илк бор шифокорлар томонидан сиам эгизаклари ўта ноёб операция натижасида ажратиб олинди, деб хабар бермоқда Соғлиқ сақлаш вазирлиги матбуот хизмати.
Маълум қилинишича, чақалоқлар 2022 йил 31 майда дунёга келган бўлиб, улардаги бу ноодатий ҳолат ҳомиланинг 28 ҳафталигида аниқланган ва бўлажак она Ўш шаҳридан Бишкек шаҳрига юборилган. 29-ҳафтада туғуруқ жараёни кесарча усулида амалга оширилган. Дунёга келганида умумий вазни 1 600 грамм бўлган чақалоқларга Фотима ва Зуҳра деб исм қўйилган.
Чақалоқлар танасининг қорин қисми, аниқроғи, жигари билан бирлашган эди. Битта ички аъзоларга эга эгизакларни ажратиш эса ўта мураккаб ва хавфли операция эди. Улар яқин қариндошлар ўртасидаги никоҳ, яъни опа-сингилларнинг фарзандларидан дунёга келган.
Туғуруқдан 10 кун ўтгач, ота-онага болаларнинг яшаб қолиш имкони умуман йўқлиги айтилиб, уйига рухсат берилган. Аммо фарзандларининг яшаб кетишидан умид узмаган ота-она орадан бир ой ўтгач, ўзбекистонлик яқинларидан Республика перинатал маркази қошидаги Неонатал хирургия ўқув-даволаш-методик маркази ҳақида эшитган ва 2022 йил июнь ойида ушбу маказга мурожаат қилган.
Марказ раҳбари эгизакларни ҳар ой онлайн тарзда тиббий назорат қилиб борган. Октябрь ойида 5 ойлик бўлиб қолган гўдаклар Тошкентга олиб келинган.
Операция 19 декабрь куни бўлиб ўтган ва амалиёт 3 соат давом этган.
«Болалар бир-бири билан жигар орқали бирлашгани ўз исботини топди. Болаларни ажратганда жигардан ва бошқа қон томирлардан қон кетишининг олдини олиш мақсадида ультратовуш ва аргон скалпели, шунингдек, Bloodstop деб аталган замонавий гемостатик материалдан фойдаландик. Натижада минимал даражада қон кетиши билан болалар ажратиб олинди, — дейди Республика перинатал маркази қошидаги неонатал хирургия маркази раҳбари Бахтиёр Эргашев.
Чақалоқлар ўт пуфаклари алоҳида-алоҳида шаклланган бўлган. Бу эса икки тана ажратилганида, бу аъзолар ўз вазифасини бекам-у кўст бажаришини таъминлаган ва эгизаклар муваффақиятли ажратиб олинган. Операциянинг кейинги босқичида тиббий жамоа икки гуруҳга бўлиниб, иш олиб борган.
Вазирлик хабарида қайд этилишича, шу пайтгача Ўзбекистонда бу турдаги амалиёт фақат бир марта Республика ихтисослаштирилган хирургия илмий-амалий тиббиёт марказида амалга оширилган. Унда ҳам операция чет элдан чақирилган мутахассис бошчилигида ва бевосита иштирокида кечган. Неонатал хирургия ўқув-даволаш-методик марказида ўтказилган ушбу ўта мураккаб амалиёт эса тўлиқ ўзбек шифокорлари томонидан амалга оширилди.
Мутахассислар болаларнинг аҳволини стабил деб баҳоламоқда. Яқин кунларда чақалоқларни яшаш жойига чиқаришга умид қилинмоқда.
Операцияда иштирок этган мутахассислар Соғлиқни сақлаш вазири Амрилло Иноятов томонидан «Соғлиқни сақлаш аълочиси» кўкрак нишони ва фахрий ёрлиқлар билан тақдирланди.
Изоҳ (0)