Ўзбекистон Маданият ва туризм вазирлигида Болгария туризм вазири Илин Димитров билан учрашув бўлиб ўтди, деб хабар бермоқда «Дунё» ахборот агентлиги.
Қайд этилишича, томонлар Ўзбекистон ҳамда Болгария ўртасида туризм соҳасидаги ҳамкорликни ривожлантириш, ўзаро сайёҳлар оқимини ошириш, соҳада фаолият олиб бораётган тадбиркорлик субъектлари ўртасида алоқалар ўрнатишга кўмаклашиш ва икки давлат ўртасида тўғридан-тўғри авиақатновларни йўлга қўйиш масалаларини муҳокама қилган.
Болгария томонига Ўзбекистон туризмида амалга оширилаётган ислоҳотлар, туристик инвестиция лойиҳалари, шунингдек, тадбиркорлик субъектлари учун яратилган шароитлар ҳамда инвесторлар учун тақдим этилаётган имтиёзлар тўғрисидаги маълумотлар тақдим этилган.
Учрашув якунлари бўйича Ўзбекистон ҳамда Болгарияда туризм соҳасида фаолият олиб бораётган тадбиркорлик субъектларини жалб этган ҳолда Тошкент шаҳрида жорий йил апрель ойида Б&Г, B2B форматида учрашувлар ташкил этиш, мамлакат туризм салоҳиятини тарғиб қилишга қаратилган маълумотларни Болгария оммавий ахборот воситаларида ёритилишини йўлга қўйиш бўйича дастлабки келишувларга эришилган.
Изоҳ (0)