«Тиббий экспертизада ўғлимнинг буйраги ва жигари ишдан чиққани маълум бўлди» — «Док-1 Макс» дан вафот этган қашқадарёлик боланинг отаси

Хабарингиз бор, Қашқадарё вилоятининг Деҳқонобод туманида 1,5 ёшли бола «Док-1 Макс» сиропини истеъмол қилиши ортидан вафот этгани, ҳолат юзасидан жиноят иши қўзғатилгани маълум бўлганди. «Дарё» мухбири вафот этган боланинг отаси билан ҳам суҳбатлашиб, қўшимча маълумотлар олишга уринди.

Оилада етти кишимиз. Дадам кичик фарзанд бўлгани учун бувим ҳам биз билан яшайди. Оила боқувчиси ўзимман. Дадам темир йўлда ишлайди, аммо ҳозир уйда бетоб бўлиб ётиб қолган. Яқинда қиз фарзандли бўлдим, ҳали бир ойлик ҳам бўлмади. Марҳум ўғлим каттаси эди, — дейди боланинг отаси Жасур Лафасов.

Ўғлимда йўтал пайдо бўлганидан кейин қишлоқ шифокорига мурожаат қилдик. Шифокор боланинг аҳволи яхши, «Док-1 Макс» сиропини ичирсангиз яхши бўлади деди. Аввал бунчалик қаттиқ йўтал бўлмаган эди, — дейди у.

13 декабрь куни шифокор ушбу дори воситасини тавсия қилди. Орадан икки кун ўтганидан кейин шифокор боладан хабар олишга келганида, дорини ҳали ҳам олиб келмаганлигимизни айтдик. 16 декабрь куни укам билан дадам туман марказидаги дорихонага бориб, уни Санжар деган кишидан сотиб олган. Ўша куни кечки пайтдан бошлаб боламга ичирилган, – дейди Жасур Лафасов.

Кунига тўрт маҳалдан ичира бошладик. Шундан сўнг, йўтал тўхтади аммо уч, тўрт кун давомида пешоб ажралмаётганлигини сездик. Кейин болам қуса бошлади. Аҳволи яхши бўлавермагач, 26 декабрь куни кечки пайт дадам ва онам боламни олиб туман марказий шифохонасининг шошилинч тиббий ёрдам бўлимига боришган. Туман шифокорлари касаллик нимадан эканлигини аниқлай олишмаган. Эртасига, 27 декабрь куни вилоят болалар шифохонасига жўнатишган. Болалар шифохонаси эса қабул қилмаган. Республика шошилинч тиббий ёрдам илмий марказининг Қарши филиалига олиб борилганида шифокорлар ўғлимни «Док-1 Макс»дан заҳарланганини айтишган.

Ўша ерда ишлайдиган Акмал исмли шифокор болани Тошкентга олиб бориш кераклигини айтган ва уни пойтахтга олиб кетишаётганида ярим йўлдан қайтаришган. 28 декабрь куни эса мени чақиришди. Мен ишдан чиқиб борганимда боламнинг аҳволи сал яхшироқ эди. Исмини айтиб, чақирганимда менга қаради. Кейин комадагидек аҳволга тушиб қолди. Ўша куни ўғлим вафот этди. Вафот этганидан кейин ИИБ ходимлари келиб қолди. Кечқурун боламни экспертизага олиб кетишди. Мени эса ДХХ биносига таклиф қилишди. Дори қачон ва қаердан сотиб олингани каби саволлар беришиб, Ҳиндистонда шу дорини ишлаб чиқарувчиларга қарши чоралар кўрилишини, ушбу дори воситаси ким томонидан Ўзбекистонга олиб келинган бўлса, уларнинг ҳаммаси қўлга олинганини айтишди, — дейди у мухбир билан мулоқотида.

Эслатиб ўтамиз, мазкур сиропни истеъмол қилиш ортидан дастлаб Самарқандда 18 нафар, Тошкент ва Қашқадарёда бир нафардан, жами 20 нафар бола вафот этгани маълум бўлганди. Сўнгра «Док-1 Макс» дорисининг хавфи хусусида жамоатчилик ҳамда вазирликка хабар берган бош шифокор бошчилигидаги тиббиёт ходимлари ишдан олингани хабар берилди. Масъуллар эса бош шифокорнинг ишдан олинишига айнан бу сабаб эмаслигини билдирди.

Кўп ўтмай Ҳиндистонда мазкур сиропни ишлаб чиқарувчи компанияга жиноят иши қўзғатилиб, мазкур сиропни ишлаб чиқариш тўхтатилди. Кейинчалик Соғлиқни сақлаш вазирлиги «Док-1 Макс» сиропи таркибида заҳарли моддалар аниқланганини, самарқандлик шифокорлар бу ҳақда вазирликни ўз вақтида хабардор қилмаганини айтиб чиқди. Мазкур воқеалардан сўнг Шавкат Мирзиёев Фармацевтика тармоғини ривожлантириш агентлиги раҳбарини ишдан олди. Кейинчалик Quramax томонидан Ўзбекистонга олиб кирилган барча дорилар сотуви тўхтатилди.  ДХХ «Док-1 Макс» ва «Амбронол» дори воситалари белгиланган тартибда лаборатория синовларидан ўтказилмаганини билдирди. ССВ Quramax’нинг сотуви тўхтатилган дори воситалари рўйхатини эълон қилди. Ҳиндистон ҳукумати «Док-1 Макс» дорисини ишлаб чиқарувчи компаниянинг лицензиясини тўхтатди.