Прогнозлаштириш ва макроиқтисодий тадқиқотлар институти (ПМТИ) мутахассислари аэропортларни ривожлантириш учун давлат-хусусий шерикликни фаоллаштириш йўлларини таҳлил қилди.
Дунё мамлакатларида хусусий секторнинг инфратузилма объектлари фаолиятидаги иштироки ортиб бормоқда. Соҳага капитал тушумларни жалб қилиш ва фаолият самарадорлигини ошириш бу тенденциянинг асосий афзалликларидир.
Аэропортларга хусусий секторни жалб қилишнинг асосан 3 модели мавжуд:
- Тўлиқ хусусийлаштириш — аэропорт активларига эгалик ҳуқуқини давлат корпорациясидан хусусий инвесторларга акцияларни жойлаштириш ёки савдо келишуви орқали ўтказиш.
- Консессия битими — хусусий оператор инфратузилмага маълум миқдорда инвестиция киритиш мажбуриятини олади ва кейинчалик харажатларини аэропорт фойдаланувчиларидан турли тўловларни ундириш ҳисобига қоплайди.
- Бошқарув шартномаси — аэропорт активларини бошқариш учун хусусий сектор жалб қилинади.
Халқаро тажрибада кенг тарқалган консессия шартномалари асосида жалб қилинган қуйидаги мисолларни келтириш мумкин:
Абиджандаги Хоfoe-Buanyi (АERIА) аэропорти, Кот-д’Ивуар
Аэропорт хизматларини ташкил қилиш ва ривожлантириш Кот-д’Ивуар ҳукумати ва АERIА ўртасида имзоланган консессия шартномаси доирасида амалга оширилади.
Консессионер бошқаруви остида йўловчилар оқими 2010—2019 йиллар оралиғида икки баравар кўпайиб, йилига 2 миллион нафардан ошди.
Йўловчи терминалининг майдони 11 000 метр квадратдан 23 000 метр квадратгача кенгайтирилди.
2019 йилда аэропорт йўловчиларга хизмат кўрсатиш бўйича халқаро миқёсда ҳам энг яхши аэропортлардан бири сифатида эътироф этилди.
Сантьяго aэропорти, Чили
Ушбу аэропорт 2015 йилда Nuevo Pudahuyel компанияси билан имзоланган 20 йиллик консессия битими асосида фаолият юритади.
Консессия кўринишида киритилган 990 миллион доллар миқдоридаги сармоя ҳисобига 248 400 метр квадрат майдонга эга янги терминал ишга туширилди ва у Сантьяго аэропортини Жанубий Америкадаги энг замонавий халқаро марказлардан бирига айлантирди.
Аэропортнинг йиллик сиғими икки баравар ошди (16 миллиондан 38 миллион йўловчига), шлюзлар сони 18 тадан 67 тага, қўниш йўлаклари сони эса 31 дан 76 гача кўпайди.
Боготадаги «Эл Дорадо» халқаро аэропорти, Колумбия
Мазкур аэропортда 20 йиллик консессия муддати давомида янги учиш-қўниш йўлаги ва такси йўллари қурилди.
Аэропортнинг йўловчи терминали Aeronautica Civil (Aerocivil) давлат агентлиги назорати остида қолди.
2007 йилда аэропорт консессия шартномаси бўйича топширилганидан сўнг, йўловчиларни ташиш 235 фоизга ошди.
Агар 2003 йилда 7 миллион йўловчи ўз манзилига етказилган бўлса, 2013 йилда бу кўрсаткич 25 миллион нафарга етди.
Ўзбекистонда ҳам ушбу йўналишда қадам қўйилган. Хусусан, 2022 йилда Самарқанд аэропорти хусусий компания — Air Marakanda хорижий корхонаси бошқарувига ўтказилди.
Ушбу компания йўловчилар, терминаллар, самолётлар ва ердан туриб техник хизмат кўрсатиш учун жавобгарликни ўз зиммасига олди.
Аввалроқ Тошкентда янги халқаро аэропорт қурилиши мумкинлиги ҳақида хабар берилганди.
Изоҳ (0)