2022 йилда Дубайда уй-жой сотиб олиш бўйича 86 мингдан ортиқ битимлар рўйхатга олинди. Мазкур кўрсаткич бутун кузатувлар тарихидаги мутлақ рекорддир. Бу ҳақда Betterhomes брокерлик компанияси маълумотларига таяниб Bloomberg хабар бермоқда.
Дубайда йил давомида сотилган кўчмас мулкнинг умумий миқдори 56,6 миллиард долларни ташкил этди (2021 йилга нисбатан 80 фоизга кўп). БАА фуқаролари бўлмаган шахслар орасида уйларни асосан россияликлар сотиб олган.
Betterhomes таҳлилчилари Россия фуқароларининг БААдаги кўчмас мулкка бўлган қизиқиши ошишини санкциялар ва сиёсий ноаниқлик билан боғламоқда.
Компания россияликларнинг Дубай кўчмас мулк бозоридаги фаолияти ҳақида тўлиқ маълумот бермаган.
2022 йил учун амирликда кўчмас мулк нархлари ўртача 11 фоизга ошди, бозорга Буюк Британия, Ҳиндистон, Италия ва Франция фуқаролари ҳам қизиқиш билдиришган.
Дубайда тузилган кўчмас мулк битимлари сони бўйича олдинги рекорд 2009 йилда қайд этилган бўлиб, ўшанда 80 000 та олди-сотди битимлари рўйхатга олинганди.
Аввалроқ экспатлар учун яшаш ва ишлаш шароити энг қулай шаҳарлар рейтинги эълон қилинганди. Улар орасида Дубай ҳам бор.
Изоҳ (0)