Агар замонавий актрисаларнинг Голливудни забт этиш учун ширин табассум ва истеъдод билан матнни талаффуз қила олиши етарли деб ўйласангиз, унда жуда қаттиқ адашасиз.
Скарлетт Йоханссон
2010 йилда «Қора бева» номи билан машҳур бўлган Наталя Романова ролини ўйнаганидан бери актриса доимий жисмоний формада. Ахир у ўзининг суперқаҳрамони билан яқин бўлиб қолган: 2010 йилда суратга олинган фильмдан кейин «Қасоскорлар», «Биринчи қасоскор: ўзга уруш», «Қасоскорлар: Алтрон даври», «Биринчи қасоскор: қарама-қаршилик» ва «Қасоскорлар: абадий уруш» фильмлари пайдо бўлди. Актриса аллақачон доимий машғулотларга ўрганиб қолган, аммо «Қурол шарпаси» фильми учун у бошқа кўникмалар – қурол ишлатишни ўрганишига тўғри келган.
Йоханссон ўзининг «Қурол шарпаси» фильмига тайёргарлик жараёнини «кўп машқлар, кейин эса мен илгари ҳеч қачон қилмаган тактик машғулотлар, жиддий қуроллар билан тўлиқ ишлаш учун ҳамма бинони тарк этиши» деб таърифлайди. Бу машғулот ҳақиқатан ҳам хавфли бўлганга ўхшайди. Шунга қарамай, Скарлеттнинг фикрига кўра, бу қатъий тартибдан кўра қизиқарлироқ эди. Актриса унга шундай таъриф беради: «Эркакдек машқ қилиш, қуён каби овқатланиш».
Ума Турман
Машҳур Квентин Тарантино фильмлари сериясида Келин образини экранда гавдалантириш учун Ума Турман нафақат шафқатсиз тўда раҳбарини йўқ қилиш, балки тўдадаги барчани мағлуб этиш учун шундай жанговар маҳоратга эга бўлиши керак эди. Бундан ташқари, у чет тилини ўрганишига ҳам тўғри келган.
Интервьюлардан бирида режиссёр унга қандай талаблар қўйганлиги ҳақидаги саволга жавоб бераркан, актриса шундай жавоб беради: «Кунг-фунинг учта услуби, қилич жангининг иккита услуби, пичоқ отиш, пичоқ билан жанг қилиш, қўл жанги, япон тилини ўрганиш. Бу шунчаки абсурд эди».
Албатта, «абсурд»дан юқори сифатли ва муносиб нарса туғилиши учун узоқ вақт керак бўлди. Турманнинг сўзларига кўра, у жанг санъати устаси билан бўладиган машғулотларга зўрға борган — ҳеч қандай енгиллик берилмаган ёки машғулотлар бекор қилинмаган: «Улар мени ҳафтасига 5 кун 3 ой давомида эрталаб соат 9 дан кечки 5 гача машқ қилдиришди. Биз ҳеч қачон кеч бошлаб, эрта тугатмаганмиз».
Анжелина Жоли
Анжелина Жоли нафақат пухта тайёргарлик кўришни талаб қиладиган ролларга интилади, балки уларни мустақил равишда мураккаблаштиради. Актриса бош ролни ўйнаган «Лара Крофт: даҳма талончиси» фильми режиссёрининг айтишича, суратга олиш бошланишидан олдин Жолига у ўзлаштириши керак бўлган жанговар техникалар рўйхатини кўрсатган. У кўплаб нарсаларни ўз ичига олган — отда юришдан тортиб, таёқ билан жанг қилишгача.
Жоли жуда кўп машқ қилишни ёқтириши аниқ. Етти йил ўтгач, у «Солт» (2010) фильмида ишлаётганда иккита янги ҳарбий тизимни ўзлаштирди. «У муай-тай ва крав-мага (Исроил томонидан ишлаб чиқилган ҳарбий қўл жанги тизими) комбинациясида ўқитилган, — дейди фильмнинг каскадёр ўқитувчиси Саймон Крейн. — Дастлабки босқичларда ҳафтасига тахминан 3-4 марта 2 соатдан машқ қилдик. Суратга олиш бошланганда тушлик танаффусларида ёки дам олиш кунларида шуғулланганмиз».
Натали Портман
Натали Портман Даррен Аронофскийнинг «Қора оққуш» фильмига тайёргарлик жараёнини шундай таърифлайди: «Мен, албатта, ўламан деб ўйлаган кунлар ҳам бўлди». «Оққуш кўли»да иккита марказий ролни ўйнаш учун тайинланган руҳий жиҳатдан беқарор балерина ролига тайёргарлик кўриш учун Портман бир йилини балет маҳоратини ривожлантиришга сарфлади. Ҳар куни у 5 соатдан шуғулланди.
Шундай қилиб, суратга олиш бошланиши билан кунлик 5 соатлик балет машғулоти 16 соатга айланди. Хореография залида жадал ўқиётган Портман, шунингдек, энг қаттиқ диетага риоя қилди, бу эса унинг 9 килога озишига олиб келди.
Женнифер Лоуренс
«Ҳаёт-мамот ўйинлари» франшизасида харизматик Китнисс Эвердин ролини ўйнаш учун Лоуренс нафақат барча актрисалик маҳоратини ишга солиши, балки ҳафтасига 6 кунни ҳамма ҳам қила олмайдиган машғулотлар учун спорт залида ўтказиши керак эди. Албатта, асосий машғулотлар ҳам бор эди: кардио машғулотлари ва спринтлар. Аммо улардан ташқари, ёш актриса ҳақиқий жанг қилиш маҳоратини ўрганди (ҳеч бўлмаганда у камонни профессионал тарзда ишлата олиши керак эди).
Актриса тан олганидек, унинг кундалик фаолиятига қояга тирмашиш, дарахтга чиқиш, жанг қилиш, югуриш ва парашютдан сакраш кирарди. Кўринишидан, бундай реал тайёргарликнинг бир қисми сифатида Лоуренс ўрмонда ухлаши керак эди. Гарчи ўша пайтда ухлаш учун вақт ҳам тополмаган.
Мавзуга доир:
Изоҳ (0)