O‘zbekiston xalq artisti, madaniyat va turizm vaziri Ozodbek Nazarbekov “Hayot va xayol yo‘llarida” ko‘rsatuviga bergan intervyusida onasizlik, hayotda rahbarlikdan tashqari o‘zining qanday vazifalari borligi va o‘ziga qanday savolni berishi haqida gapirib berdi.
“Kechagi tajribalar bugungi muammoni hal qila olmayapti”
O‘zimga o‘zim bugungi kunda nima sababdan madaniyat vaziriman, deb savol beraman. Bugun har bir sohada, har bir yo‘nalishda yangilanish, yangicha munosabatlar bilan turmush tarzimizni shakllantirish jarayoni ketmoqda. Bu ko‘z yumib bo‘lmaydigan haqiqat. Kechagi tajribalar bugungi muammoni hal qila olmayapti. Shuning uchun aytmoqchimanki, bugun yangilanayotgan O‘zbekistonda hamma kashfiyot qilmoqda.
“Ko‘pincha inson jim bo‘ldim deganda ruhiyati bilan gaplashadi”
Ruhiyatimda bo‘layotgan o‘zgarishlar kundan kunga ulg‘ayayotganimni ta’kidlamoqchi bo‘lyapti. Ko‘pincha inson jim bo‘ldim deganda ruhiyati bilan gaplashadi. Menda ham shunaqa jarayonlar ko‘p bo‘ladi. Har doim har kim, har narsa o‘rnida turgani yaxshi.
“Aql ishonadigan darajada bo‘lsa, ishonish kerak”
Inson ijodda qalbga, yashashda aqlga bo‘ysunishi kerak, lekin tanlovlarda, ayniqsa, insonning turmush tarzida doim aql bilan maslahatlashishni yaxshi ko‘raman. Aql ishonadigan darajada bo‘lsa, ishonish kerak. Xullas, aqlga ko‘p vazifa yuklash kerak.
“Har bir o‘rinda vazifam bor, shularni to‘ldirishim va jamiyatda ijobiy iz qoldirishim kerak”
Umrimizning oxirigacha oq bilan qoraning o‘rtasida kurashib o‘tamiz. Bu narsadan to jon uzilmaguncha qutula olmaydi. Har kun oq-qoraga duch kelib kurashamiz va mana shularni ajratishda og‘zimiz, qo‘limiz, peshonamiz kuyadi, boshimiz yoriladi va asta-sekin oqni oqqa, qorani qoraga ajratib boramiz. Bu yo‘lning qayeridadir xato qilamiz, lekin umr o‘tgani sari qulog‘imizga haqiqatni aytib boradi.
Xohlasak, xohlamasak buni qulog‘imizga aytgani sari biz ulg‘ayib boraveramiz. Bugun men ham shu jarayondaman, kundan kunga pishyapman. Bu zimmamga yuklatilgan vazifalar, bugun men boboman, otaman, qaynotaman, o‘g‘ilman, ukaman. Har bir o‘rinda vazifam bor, shularni to‘ldirishim va jamiyatda ijobiy iz qoldirishim kerak. Agar bir inson shunchalik yashasa — baxt.
“Onasiz insonni yupun, yomg‘irda soyabonsiz turgandek tasavvur qilaman”
Insonga yashashni ona o‘rgatadi, onasiz yashash — hayotda yashashni o‘zing o‘rgan degani. Hozir 50 yoshga kirdim, do‘stlarimning oldida onasi bor. Ular shu yoshga kirgan bo‘lsa ham, onasi uchun hali ham bola, har qanday vaziyatda ham onasi qalqon bo‘lib turib beradi. Onasiz insonni yupun, yomg‘irda soyabonsiz turgandek tasavvur qilaman.
Yomg‘ir, ayoz hayotning qiyinchiliklari bo‘lsa, shunaqa vaziyatda birinchi o‘rinda insonni bag‘riga bosadigan inson — ona. Onani qo‘zilarni bo‘ridan asrovchi qo‘riqchiga o‘xshataman. Onasizlik — insonning katta tog‘i, suyanchig‘i ketishi.
“Gohida to‘g‘ri, gohida xato qilyapman”
O‘zimga ko‘pincha to‘g‘ri qildimmikan, degan savolni bersam kerak. Gohida to‘g‘ri, gohida xato qilyapman. Xato ham qilamiz, yutuqlarimiz ham bor.
Mavzuga doir:
- “Uyga kelsangiz, qulog‘ingizga aytaman” — madaniyat vaziri Ozodbek Nazarbekov Ukrainadagi urushga shaxsiy munosabatini bildirmadi.
- Ozodbek Nazarbekov litsenziya narxi qanday belgilanishi, xonandalarning internetdagi janjali hamda Kanizaning “xurmacha qiliqlari”ga munosabati haqida (video).
- Ozodbek Nazarbekov vazir bo‘lishdan ko‘ra xonandalik yaxshiroq ekani hamda hozirgi lavozimida qancha oylik olishi haqida gapirdi (video).
- “Biz xususiy telekanallarga ta’sir qila olmaymiz”. Ozodbek Nazarbekov kliplarni efirdan oldirib tashlash to‘g‘risida gapirdi.
Izoh (0)