Бишкек душанба куни ҳаво ифлосланиши бўйича дунёда биринчи ўринга чиқиб олди. Бу ҳақда ҳаво сифати рейтингини эълон қилувчи «www.iqair.com» сайтида маълум қилинди.
Сайт маълумотларига кўра, Қирғизистон пойтахтида ҳавонинг ифлосланиши 306 AQI (ҳаво сифати индекси) — «хавфли» даражага тўғри келади. Айни пайтда бу кўрсаткич 298 га пасайган.
Иккинчи ўринда Дакка (Бангладеш) — 193 AQI, учинчи ўринда Карачи (Покистон) — 166 AQI қайд этилган. Бу шаҳарларда ҳавонинг тозалик даражаси «зарарли» деб баҳоланади.
Тошкент кун бошида ҳавонинг ифлосланиши бўйича учинчи ўринда бораётган эди. Ҳозирда шаҳар 158 AQI билан еттинчи поғонада бўлиб турибди.
Ушбу рўйхатнинг ўнлигига, шунингдек, Деҳли (Ҳиндистон), Карачи (Покистон), Мумбай (Ҳиндистон), Аккра (Гана), Скопе (Македония), Калкутта (Ҳиндистон) ва Улан-Батор (Мўғилистон) киради.
Атроф-муҳит билан боғлиқ муаммолар Қирғизистон пойтахтида илк бор 2017 йилнинг ноябрида бошланган, ўшанда шаҳар ҳавосининг ифлосланиш даражаси рухсат этилган максимал меъёрлардан бир неча бор ошиб кета бошлаган.
Ўшандан бери Бишкек ҳавоси тахминан ноябрь ойининг ўрталаридан февраль ойининг ўрталарига қадар дунёдаги энг ифлос ҳаволардан бири ҳисобланади.
Маҳаллий экологларнинг фикрича, бу ҳам тоғлардан келаётган шамолни тўсиб қўйган кўп қаватли уйлар билан шаҳарнинг тартибсиз ривожланиши натижаси бўлган.
Шунингдек, аҳоли томонидан қишда хусусий уйларни иситиш учун кўмирдан оммавий фойдаланиш ҳам бунга сабаб бўлмоқда.
Мамлакат ҳукумати ушбу экологик муаммони бир неча бор ҳал қилишга уринган, аммо ҳозиргача буни амалга оширишнинг имкони бўлмаган.
Аввалроқ 2022 йилнинг октябрь ойида Тошкент ҳавонинг ифлосланиши бўйича дунёда биринчи ўринга чиқиб олганди.
Изоҳ (0)