Bishkek dushanba kuni havo ifloslanishi bo‘yicha dunyoda birinchi o‘ringa chiqib oldi. Bu haqda havo sifati reytingini e’lon qiluvchi “www.iqair.com” saytida ma’lum qilindi.
Sayt ma’lumotlariga ko‘ra, Qirg‘iziston poytaxtida havoning ifloslanishi 306 AQI (havo sifati indeksi) — “xavfli” darajaga to‘g‘ri keladi. Ayni paytda bu ko‘rsatkich 298 ga pasaygan.
Ikkinchi o‘rinda Dakka (Bangladesh) — 193 AQI, uchinchi o‘rinda Karachi (Pokiston) — 166 AQI qayd etilgan. Bu shaharlarda havoning tozalik darajasi “zararli” deb baholanadi.
Toshkent kun boshida havoning ifloslanishi bo‘yicha uchinchi o‘rinda borayotgan edi. Hozirda shahar 158 AQI bilan yettinchi pog‘onada bo‘lib turibdi.
Ushbu ro‘yxatning o‘nligiga, shuningdek, Dehli (Hindiston), Karachi (Pokiston), Mumbay (Hindiston), Akkra (Gana), Skopye (Makedoniya), Kalkutta (Hindiston) va Ulan-Bator (Mo‘g‘iliston) kiradi.
Atrof-muhit bilan bog‘liq muammolar Qirg‘iziston poytaxtida ilk bor 2017-yilning noyabrida boshlangan, o‘shanda shahar havosining ifloslanish darajasi ruxsat etilgan maksimal me’yorlardan bir necha bor oshib keta boshlagan.
O‘shandan beri Bishkek havosi taxminan noyabr oyining o‘rtalaridan fevral oyining o‘rtalariga qadar dunyodagi eng iflos havolardan biri hisoblanadi.
Mahalliy ekologlarning fikricha, bu ham tog‘lardan kelayotgan shamolni to‘sib qo‘ygan ko‘p qavatli uylar bilan shaharning tartibsiz rivojlanishi natijasi bo‘lgan.
Shuningdek, aholi tomonidan qishda xususiy uylarni isitish uchun ko‘mirdan ommaviy foydalanish ham bunga sabab bo‘lmoqda.
Mamlakat hukumati ushbu ekologik muammoni bir necha bor hal qilishga uringan, ammo hozirgacha buni amalga oshirishning imkoni bo‘lmagan.
Avvalroq 2022-yilning oktabr oyida Toshkent havoning ifloslanishi bo‘yicha dunyoda birinchi o‘ringa chiqib olgandi.
Izoh (0)