Германия канцлери Олаф Шольц Украинага танклар етказиб бериш масаласида АҚШ президенти Жо Байденнинг позициясидан келиб чиқади. Бу ҳақда Politico нашри Германиядаги манбаларига таяниб ёзмоқда. Аввалроқ икки мамлакат етакчилари жанговар пиёда машиналарини юбориш бўйича ўз қадамларини мувофиқлаштириб олган эди.
Шольц шу ҳафта Берлиндаги ҳудудий сайловолди митингда Леопард танкларини етказиб бериш «дўстлар ва иттифоқдошлар, айниқса, бизнинг трансатлантик шеригимиз, АҚШ билан» муҳокама қилиниши керак, деган эди. Politico қайд этишича, канцлерга Лондоннинг Киевга ўзининг Challenger 2 танкларини юбориш қарори босим ўтказмоқда — Буюк Британия Украинага Ғарбда ишлаб чиқарилган танкларни берадиган биринчи мамлакатга айланиши мумкин. Бундан ташқари, Польша Украинага Германияда ишлаб чиқарилган танкларни етказиб беришини эълон қилиб бўлди.
Канцлернинг вакили аввалроқ Буюк Британиянинг режалари Германия позициясини ўзгартирмаслигини айтганди. Шольц Леопард танкларини юбориш масаласини ҳал қилишда Германия ёлғиз ҳаракат қилмаслиги кераклигини кўп бора таъкидлаган.
Пентагон Украинага Америкада ишлаб чиқарилган Абрамс танкларини юбормаслигини айтиб, буни улар кўп ёнилғи сарфлаши ва улардан фойдаланиш қийинлиги билан изоҳлаганди. Бундан ташқари, АҚШ улар томонидан етказиб берилаётган Bradley пиёда жанговар машиналари — «танклар қотиллари» эканини айтганди.
Бу танклар кўплаб мамлакатларда, хусусан, Испания, Польша, Греция, Дания ва Финляндияда ҳам бор. Аммо уларни Мюнхендаги Krauss-Maffei Wegmann компанияси ишлаб чиқаради, шу сабабли уларни Украинага етказиб бериш учун ишлаб чиқарувчи мамлакатнинг реэкспорт учун рухсати керак, шу муносабат билан ҳозир «халқаро босим Берлинга қаратилган», деб ёзганди Politico.
Изоҳ (0)