Шавкат Мирзиёев 12 январь куни Ҳиндистон бош вазири Нарендра Моди раислигида онлайн шаклда ўтказилган «Глобал Жануб овози» саммити ялпи мажлисида нутқ сўзлаб, ривожланаётган мамлакатларни қўллаб-қувватлашга қаратилган ташаббусларни илгари сурди.
Президент матбуот хизматининг маълум қилишича, Ҳиндистоннинг «Катта йигирматалик»ка (G20) раислиги доирасида ташкил этилган тадбирда Ветнам президенти Нгуен Суан Фук, Гаяна президенти Муҳаммад Ирфон Али, Мозамбик президенти Филипе Нюси, Сенегал президенти Маки Салл, Бангладеш бош вазири Шайх Хасина, Мўғулистон бош вазири Лувсаннамсрайн Оюун-Эрдене, Таиланд Қироллиги бош вазири Прают Чан Оча, Камбоджа Қироллиги бош вазири Хун Сен ва Папуа-Янги Гвинея Мустақил Давлати бош вазири Жеймс Марапе қатнашди.
Кун тартибига мувофиқ, инсон манфаатларига йўналтирилган барқарор ривожланиш масалалари муҳокама қилинди, ривожланаётган мамлакатларнинг манфаатларини илгари суриш ва долзарб муаммоларини ҳал қилиш мақсадида, шу жумладан, иқтисодиёт, экология, энергетика ва озиқ-овқат хавфсизлиги, соғлиқни сақлаш, инсон ресурсларини ривожлантириш, инновациялар, туризм ва бошқа йўналишлардаги ўзаро манфаатли ҳамкорликни чуқурлаштириш юзасидан фикр ва аниқ таклифлар алмашилди.
Ўзбекистон президенти Ҳиндистоннинг G20 га раислигини қўллаб-қувватлаб, кун тартибидаги масалалар юзасидан қатор амалий таклифларни илгари сурди.
Энг аввало, бугунги кунда мавжуд халқаро савдо тизимини «Глобал Жануб овози»ни эътиборга олган ҳолда такомиллаштириш таклиф қилинди.
Асосий бозорларга чиқишда ҳамон турли тўсиқ ва чекловларга дуч келаётган ривожланаётган мамлакатларнинг салоҳиятини рўёбга чиқариш учун зарур шароитлар яратилиши лозим.
Ривожланаётган давлатларнинг энергетика ва озиқ-овқат хавфсизлигини таъминлаш, глобал логистика ва қўшимча қиймат занжирларини яратиш, инвестиция ва энг замонавий технологияларни жалб этишда кўмаклашиш масалалари жаҳон саммити кун тартибидан ўрин олиши мақсадга мувофиқлиги қайд этилди.
Яна бир стратегик масала «Шимол—Жануб» халқаро йўлаги доирасида Марказий ва Жанубий Осиё ўзаро боғлиқлигини кучайтиришга қаратилган, Афғонистон орқали Ҳинд океанига чиқадиган темир йўлни қуриш лойиҳасини фаол илгари суриш. Шавкат Мирзиёев ҳамкорларни ушбу муҳим лойиҳада иштирок этишга чақирди.
Таҳлиллар шуни кўрсатмоқдаки, «яшил» иқтисодиётга ўтиш шароитида тараққий этган ва ривожланаётган мамлакатлар ўртасидаги катта технологик фарқ ўсиб бормоқда. Шу муносабат билан жаҳоннинг етакчи давлатлари кўмагида «Глобал Жануб» учун «яшил» технология ва инновациялар ахборот банкини яратиш таклиф қилинди.
Инсон капиталини ривожлантириш ва профессионал таълим сифатини ошириш навбатдаги долзарб масала экани ҳам кўрсатиб ўтилди.
«Иқтидорли ёшларимизни иқлим ўзгариши, сув ресурсларидан оқилона фойдаланиш, муқобил энергетика, рақамлаштириш ва бошқа устувор соҳалардаги миллий ва халқаро дастурларни ишлаб чиқишга кенг жалб этишимиз керак», — деди Шавкат Мирзиёев.
Шундан келиб чиқиб, «Жануб ёшлари овози» доимий мулоқот платформасини ташкил этиш ташаббуси илгари сурилди.
Глобал миқёсда тинчлик ва хавфсизликни таъминлаш мақсадида давлатимиз раҳбари Ўзбекистон илгари сураётган Афғонистон муаммосини ҳал этиш бўйича халқаро мулоқот гуруҳини шакллантириш таклифини қўллаб-қувватлашга чақирди.
Сўзининг якунида Ўзбекистон президенти дўст Ҳиндистон халқини яқинлашиб келаётган миллий байрам — Республика куни билан самимий табриклади.
Изоҳ (0)