2022 йил декабрь ойи давомида Энергетика вазирлиги ишчи гуруҳи томонидан ўтказилган назорат тадбирларида 719 та ҳолатда 35,5 млн кВт-соат электр энергиясидан ноқонуний фойдаланиш ҳолатлари аниқланди. Бу ҳақда вазирлик ахборот хизмати хабар қилди.
Бунинг натижасида тизимга 15,7 млрд сўм зарар келтирилганлиги маълум бўлди. Ушбу ҳажмдаги электр энергияси ўртача 177 мингдан ортиқ хонадоннинг бир ойлик ёки Сир дарё вилояти истеъмолчиларининг бир ҳафталик электр энергияси истеъмолини ташкил қилади.
Ноқонуний фойдаланишнинг энг кўп ҳолатлари айниқса Андижон, Қашқадарё, Самарқанд ва Тошкент вилоятлари ҳиссасига тўғри келади.
Масалан, Самарқанд вилоятидаги «Мароқанд сифат текстил» МЧЖда 2,3 млрд сўм, Тошкент вилоятидаги «Спринг Колоурс Индустрий» МЧЖда 1,4 млрд сўм, Андижон шаҳридаги «Ф.Х.С» МЧЖда 684,17 миллион сўм миқдоридаги қайта ҳисоблаш ишлари амалга оширилган.
Қоидабузар истеъмолчиларга нисбатан белгиланган тартибда чоралар кўрилиб, тегишли ҳужжатлар ҳуқуқни муҳофаза қилувчи органларга тақдим этилган.
Назорат тадбирлари давом эттирилмоқда.
Изоҳ (0)