Британияликларнинг катта қисми шаҳзода Гарри ва унинг рафиқаси Меган Марклни қироллик унвонларидан маҳрум қилиш тарафдори бўлиб чиқди. Бу ҳақда YouGov ўтказган сўров натижалари гувоҳлик бермоқда, деб ёзади The Times.
Таъкидланишича, сўров иштирокчиларининг 44 фоизи фикрича, шаҳзода Гарри ўз унвони — Сассекс шаҳзодалигидан маҳрум этилиши керак, уларнинг 32 фоизи эса бундай фикрда эмас.
Бундан ташқари, сўровда қатнашган британияликларнинг 65 фоизи Гарри ва Меган қироллик мажбуриятларидан ўз ихтиёри билан воз кечган деб ҳисоблайди, уларнинг 11 фоизигина жуфтлик қироллик оиласидан кетишга мажбур қилинган, деган фикрда.
Шунингдек, Меган Марклнинг қироллик оиласи аъзоларидан бири унинг фарзанди қора танли бўлиб туғилганидан норози бўлгани ҳақидаги гапларини изоҳлар экан, респондентларнинг 49 фоизи Брфитания қироллик оиласини ирқчи институция деб ҳисобламаслиги маълум бўлди (26 фоизи аксинча фикрда).
Сўров қатнашчиларининг ярмидан кўпи (53 фоизи) бундай муносабат учун қироллик оиласи Гарри ва Мегандан кечирим сўраши керак эмас, деб ҳисоблайди, 19 фоизигина улар узрга арзишини айтган.
Сўров муаллифлари респондентлардан Гарри ва Меган ҳақидаги Netflix сериали уларнинг жуфтликка бўлган муносабатига қандай таъсир қилгани билан қизиққан. Маълум бўлишича, 23 фоиз британияликлар шоуни кўрганидан кейин Гарри ва Меган ҳақидаги фикри ёмон томонга ўзгарган. Аксинча, 7 фоиз аҳоли улар ҳақида яхшироқ фикрда бўла бошлаган.
Шу билан бирга, сериал кўпчилик томошабинларда Гаррининг акаси шаҳзода Уильям ва унинг рафиқаси Кейт Миддлтонга нисбатан муносабатини яхши томонга ўзгартирган. Респондентларнинг 44 фоизи Уильям ва Кетрин, 17 фоизи эса Гарри ва Меганга ён босган.
«Гарри ва Меган» сериалининг премьераси 8 декабрь куни бўлиб ўтди. Кутилгандек, лойиҳа катта шоу-шувларга сабаб бўлди. Қиролича Елизаветта II нинг невараси шаҳзода Гарри ва унинг рафиқаси ҳақидаги сериал 175 миллион соатдан ортиқ кўрилган, шунингдек, 85 дан ортиқ мамлакатларда топ-10 таликка кирган. Netflix’нинг янги лойиҳаси намойиш этилгандан сўнг, қироллик оиласи «қайғули ҳолат»га тушди. Жуфтлик қиролича Елизаветта II ни масхара қилиб, Британия ва қироллик аъзолари ирқчи экани ҳақида фикр билдирганликда айбланди.
Мавзуга доир:
Изоҳ (0)