Бухоро—Тошкент йўналишидаги «Афросиёб» поезди тўхтаб қолгани сабаб йўловчилар захира поездда етказиб қўйилди. Бу ҳақда «Ўзбекистон темир йўллари» матбуот хизмати хабар берди.
Маълум қилинишича, 2023 йил 1 январь куни ушбу йўналишдаги 769-сонли «Афросиёб» поезди электр кучланишли сим тармоғидаги носозлик сабабли Янги Чиноз—Чиноз перегон оралиғида тўхтаб қолган. «Ўзбекистон темир йўллари» поезд Тошкентга кечикиб келиши ҳақида огоҳлантирган.
Йўловчиларни манзилга хавфсиз етказиб келиш мақсадида 20:35 да Тошкент Шимолий вокзалидан захира «Афросиоб» электропоезди жўнатилган ва поезд Чиноз бекатига 21:05 етиб бориб, 269 нафар йўловчи захира поездига хавфсиз ўтказилган. Соат 22:05 да поезд Тошкент Марказий вокзалига етиб келган.
«Йўловчиларга йўл давомида қўшимча иссиқ чой, кофе ва озиқ-овқат бепул тарқатилди. 269 нафар йўловчига чипта нархи тўлиқ қайтариб берилади», — деб қайд этилган хабарда.
Изоҳ (0)