Фарғона вилояти Қўқон шаҳрида Суриядаги террористик ташкилотни молиялаштириш ниятида бўлган фуқароларга суд ҳукми ўқилди. Бу ҳақда ЎзА хабар қилди.
Қайд этилишича, Қўқон шаҳрида яшовчи К.Ҳ. (1995 йилда туғилган) 2019 йилда Россия Федерациясининг Москва шаҳрига ишлаш учун бориб, ижтимоий тармоқлар орқали Сурия давлатидаги «Тавҳид ва жиҳод катибаси» террористик ташкилоти аъзолари таъсирига тушиб қолган. Уларнинг даъватлари оқибатида ташкилот ғояларига хайрихоҳлик билдириб, «молиявий жиҳод» қилишга аҳд қилган.
Ушбу мақсадда танишларидан пул йиққан, лекин ўзига боғлиқ бўлмаган ҳолатлар сабабли юбора олмаган.
Шунингдек, К.Ҳ. Қўқон шаҳрида яшовчи таниши С.З.ни (1996 йилда туғилган) ҳам тўғри йўлдан адаштириб, уни Суриядаги биродарларга моддий ёрдам беришга ундаган.
Ўз навбатида, С.З. Ўзбекистон Республикаси ҳудудида яшовчи шахсларни ёллаб, «молиявий жиҳод» қилишга чорлаши ва улар берган пул маблағларини Суриядаги террористик ташкилотлар аъзоларига юбориши керак бўлган.
К.Ҳ.нинг навбатдаги топшириғига кўра, С.З. Telegram мессенжери орқали Суриянинг Идлиб шаҳрида яшовчи шахс билан боғланиб, унга 50 минг доллар юборишни режалаштираётганини айтган.
Лекин Давлат хавфсизлик хизматининг Фарғона вилояти бўйича бошқармаси ходимлари томонидан Қўқон шаҳрида ўтказилган тезкор тадбирда С.З. ушбу пул маблағини юбормоқчи бўлган вақтида жиноят устида қўлга олинган.
Шунингдек, К.Ҳ. ҳам хорижда ушланиб, Ўзбекистонга олиб келинган.
Жиноят ишлари бўйича Қўқон шаҳар судининг ҳукмига кўра, қонунбузарлар Жиноят кодексининг тегишли моддалари билан айбдор деб топилиб, К.Ҳ. 8 йил муддатга, С.З. эса 5 йил муддатга озодликдан маҳрум этилган.
Изоҳ (0)