Ўзбекистонда адвокатлар қўшимча қиймат солиғи тўламайди. Қонунчилик палатасининг 27 декабрь куни бўлиб ўтган мажлисида адвокатлик тузилмаларини қўшимча қиймат солиғи тўловчиларига айлантириш назарда тутилган норма қонун лойиҳасидан чиқариб ташланди.
Қуйи палата матбуот хизматининг маълум қилишича, навбатдаги мажлисда «Солиқ ва бюджет сиёсатининг 2023 йилга мўлжалланган асосий йўналишлари қабул қилинганлиги муносабати билан Ўзбекистоннинг айрим қонун ҳужжатларига ўзгартиш ва қўшимчалар киритиш тўғрисида»ги қонун лойиҳасининг муҳокамаси ниҳоятда қизғин кечди.
Таъкидланганидек, сўнгги йилларда Ўзбекистонда адвокатура институтининг инсон ҳуқуқлари, эркинликлари ва қонуний манфаатларини ҳимоя қилишдаги салоҳиятини тубдан ошириш, адвокатура институтининг давлат органлари ва бошқа тузилмалардан мустақиллигини таъминлашга қаратилган ислоҳотлар амалга оширилмоқда.
Бироқ қонун лойиҳаси билан Солиқ кодексининг 70-бобини (адвокатлар ҳайъатларига, адвокатлик фирмаларига, адвокатлик бюроларига ва адвокатларга солиқ солишнинг ўзига хос хусусиятлари) чиқариб ташлаш йўли билан адвокатлик тузилмаларини қўшимча қиймат солиғи тўловчиларига айлантириш назарда тутилмоқда.
Бу каби омиллар адвокатлар томонидан кўрсатиладиган юридик ёрдамнинг қиймати оширилишига, фуқаролар ва юридик шахсларнинг малакали юридик ёрдамни олиш имконияти пасайишига сабаб бўлади.
Шундан келиб чиқиб халқ вакиллари киритилаётган ўзгартиш ва қўшимчалар адвокатлар фаолиятига салбий таъсир қилиши мумкинлигини айтиб, уни чиқариб ташлаш таклифини илгари сурди.
Узоқ давом этган тортишувлар, савол-жавоблар ва бахс-мунозаралардан сўнг, депутатлар таклифи билан ушбу норма қонун лойиҳасидан чиқариб ташланди.
Изоҳ (0)