Наманганда Янги йил арафасида 400 дан ортиқ эҳтиёжманд оила вакилларига байрам совғалари топширилди. Бу ҳақда «Дарё» мухбири Азизбек Абдувалиев хабар бермоқда.
Вилоят ҳокими Шавкат Абдураззоқов таклифи билан бундай оилалар рўйхати маҳаллий журналист ва блогерлар томонидан шакллантирилди.
«Халқ орасида кўп юрасиз, уларнинг дард ва ташвишини биздан ҳам яхши биласиз. Қаҳрамонларингиз орасида камтар-камсуқум, шароити оғир бўлса ҳам қайсидир идорага боришга истиҳола қиладиганлар бўлиши мумкин. Шунинг учун сизларнинг таклифингиз асосида байрам олдидан совға оладиганлар рўйхатини тузайлик», — дея фикр билдирганди вилоят ҳокими.
Наманган шаҳридаги «Баркамол авлод» мажмуасида ўтказилган тадбирда вилоят ҳокими ва сектор раҳбарлари иштирок этди.
Улар эҳтиёжманд оилалар вакилларига 18 турдаги озиқ-овқат маҳсулотлари, янги йил совғалари ва иссиқ кийимлар тақдим этди. Шундан сўнг болалар учун байрам дастури намойиш этилди.
Изоҳ (0)