Ўзбекистон ҳукумати делегациясининг 24 декабрь куни Озарбайжонга ташрифи доирасида инвестициялар ва ташқи савдо вазири Жамшид Хўжаев «Алят» эркин иқтисодий зонаси ва «Боку халқаро денгиз савдо порти» раҳбарияти билан учрашувлар ўтказди, деб хабар бермоқда Инвестициялар ва ташқи савдо вазирлиги матбуот хизмати.
Музокаралар чоғида Озарбайжон порти ва ЭИЗ ресурслари ва имкониятларидан биргаликда фойдаланиш асосида сармоявий, транспорт ва логистика соҳасидаги ҳамкорликни йўлга қўйиш истиқболлари муҳокама қилинган.
Хусусан, Озарбайжон «Алят» ЭИЗ бошқаруви раиси Валеҳ Алескеров билан эркин иқтисодий зонада озиқ-овқат, чарм-пойабзал, тўқимачилик ва бошқа юқори талабга ва қўшилган қийматга эга маҳсулотлар ишлаб чиқариш ва Европа Иттифоқи мамлакатлари, МДҲ ва бошқа қўшни давлатлар бозорларига экспортни ташкил этиш бўйича қўшма лойиҳаларни амалга оширишга урғу берган ҳолда сармоявий ҳамкорликни кенгайтириш истиқболлари муҳокама қилинган.
«Боку халқаро денгиз савдо порти» бош директори Талеҳ Зиядов билан транспорт-логистика алоқаларини янада кенгайтириш, хусусан, контейнерлар ташиш ва «Ро-Ро» усулида юкларини денгиз портлари орқали етказиш ҳажмини ошириш имкониятлари кўриб чиқилган. Томонлар Халқаро автомобиль транспорти тўғрисидаги ҳукуматлараро битим имзоланганини олқишлаган.
Боку халқаро денгиз савдо порти негизида ўзбек омборлари ва контейнер терминалларини очиш истиқболлари ҳамда юкларни, жумладан, кундалик эҳтиёжлар учун зарур товарларни икки давлат ҳудудлари орқали ўзаро ташиш масалаларини муҳокама қилиш учун халқаро автомобиль транспорти бўйича Аралаш комиссия йиғилишини ўтказиш лозимлиги таъкидланган.
Учрашувлар якунида муҳокама қилинган лойиҳа ва ташаббусларни амалга ошириш доирасида келгусидаги ҳамкорлик формати келишиб олинган.
Мавзуга доир: Ўзбекистон Ўрта коридор орқали Европага биринчи контейнер поездини юборди
Изоҳ (0)