Ўзбекистон президентининг «Гимнастика спорт турларини янада ривожлантириш чора-тадбирлари тўғрисида»ги қарори имзоланди.
Ҳужжатга кўра, 2023/2024-ўқув йилидан бошлаб мактабгача таълим ташкилотларида «Гимнастикага илк қадам» дастури, умумий ўрта таълим мактабларида бошланғич синф ўқувчиларига мўлжалланган, гимнастика спорт турлари бўйича спорт мактабининг бошланғич тайёргарлик гуруҳлари учун ишлаб чиқилган дастур асосида «Болалар учун гимнастика» дастури жорий қилинади.
«Болалар учун гимнастика» дастури доирасида гимнастика билан шуғулланиш истаги юқори бўлган ўқувчиларга эга ҳамда спорт заллари мавжуд умумий ўрта таълим мактаблари белгилаб олинади. Танлаб олинган умумий ўрта таълим мактабларида гимнастика спорт турлари бўйича дарсдан ташқари алоҳида спорт секцияларида машғулотлар мактаб жойлашган ҳудуддаги спорт мактабидан жалб этилган тренерлар томонидан олиб борилади.
Умумий ўрта таълим мактабларида гимнастика залларини ташкил этиш, мавжуд гимнастика инфратузилмасини кенгайтириш ва жиҳозлаш учун инвестиция ва грантлар жалб қилинади.
Спортни ривожлантириш вазирлиги, Ўзбекистон гимнастика федерацияси билан биргаликда гимнастика спорт турларини ўқувчилар ўртасида оммалаштириш бўйича танланган мактабларни видеодарсликлар, гимнастика гиламлари, жиҳозлари ва бошқа зарур анжомлар билан таъминлаш учун Халқ таълими соҳасида ислоҳотларга кўмаклашиш жамғармаси маблағлари ҳисобидан ҳар йили зарур маблағларни йўналтирилади.
Спортни ривожлантириш вазирлиги тизимида биринчи босқичда Нукус, Самарқанд ва Фарғона шаҳарларида замонавий моддий-техника ва ўқув-машқ базасига эга бўлган ҳудудий Гимнастика спорт турларига тайёрлаш марказлари ташкил этилади. Бундай марказлар ўз фаолиятини 2024/2025-ўқув йилидан бошлайди. Улардаги ўқувчиларининг умумий контингенти жами 132 нафарни ташкил этиб, улар 1–11-синф ўқувчиларидан иборат бўлади.
Гимнастика марказлари ўқувчиларини овқатлантириш харажатлари давлат бюджети маблағлари ҳисобидан амалга оширилади.
Гимнастика марказларини замонавий ва халқаро талабларга мувофиқ ташкил этиш (бинолар қуриш, мавжудларини реконструкция қилиш ва таъмирлаш) «Ўзавтосаноат» АЖнинг ҳомийлик маблағлари ҳисобидан амалга оширилади. Марказларни замонавий жиҳоз ва инвентарлар билан таъминлаш учун Спортни ривожлантириш вазирлигига давлат бюджетидан зарур маблағ ажратилади.
Изоҳ (0)