Ўзбекистон 22 декабрь куни Афғонистонга тўққизта махсус юк машинасига ортилган инсонпарварлик ёрдамини жўнатганди. ТИВ матбуот хизмати Ҳайратон шаҳрида ушбу инсонпарварлик ёрдамини топширишга бағишланган тантанали маросим ҳақида маълумот берди.
Қайд этилишича, умумий оғирлиги 170 тоннадан зиёд бўлган инсонпарварлик ёрдами ун, гуруч, буғдой, ўсимлик ёғи, консерва маҳсулотлари, кийим-кечак ва пойабзалдан иборат.
Инсонпарварлик ёрдамини топшириш маросимига келган Исматулла Иргашев ва Тўра Боболов бошчилигидаги расмийларни Балх вилояти губернатори Мулло Муҳаммад Довуд Музаммил ва провинциянинг бошқа бошқарув идоралари вакиллари кутиб олди.
Маросимда сўзга чиққан Балх вилояти губернатори Мулло Муҳаммад Довуд Музаммил Ўзбекистон Президенти Шавкат Мирзиёевга Афғонистон учун оғир ва синовли паллада афғон халқини қўллаб-қувватлагани ва бирдамлиги учун чуқур ҳамда самимий миннатдорлик билдирди.
Ўзбекистон раҳбари кўпмиллатли Афғонистон халқига биродарлик муносабати намунасини бутун дунёга яна бир бор намоён этгани ҳамда бу ташаббус бутун жаҳон ҳамжамияти учун яққол ўрнак бўлишини алоҳида таъкидланди.
Ўзбекистон президентининг Афғонистон бўйича Махсус вакили Исматулла Иргашев ва Сурхондарё вилояти ҳокими Тўра Боболов Афғонистонга нафақат инсонпарварлик ёрдам кўрсатиш, балки Сурхондарё вилояти ва Афғонистоннинг Балх провинцияси ишбилармон доиралари вакиллари ўртасида савдо-иқтисодий ҳамкорликни фаоллаштиришнинг устувор йўналишларини ҳам қайд этди.
Томонлар Ўзбекистоннинг Сурхондарё вилояти ва Балх провинцияси раҳбарлари даражасидаги чегара масалалари бўйича Қўшма ишчи гуруҳи ишини яқин кунларда Термиз шаҳрида навбатдаги йиғилишини ўтказиш билан давом эттиришга келишиб олди. Бу нафақат чегараолди ҳудудларидаги савдони ривожлантириш, балки икки давлат ўртасидаги иқтисодий ҳамкорликни мустаҳкамлашга ҳам хизмат қилиши таъкидланди.
Эслатиб ўтамиз, Ўзбекистон бундан аввал сентябрь ойида инсонпарварлик юклари жўнатганди. 58 тонналик зарур озиқ-овқат маҳсулотлари ортилган автомашиналар Ҳайратон чегара ўтказиш пункти орқали Балх вилояти шимолидаги Калдор туманига етказиб берилганди.
Изоҳ (0)