Айни вақтда Ўзбекистон президенти Шавкат Мирзиёев Олий Мажлисга мурожаатнома йўлламоқда. Бу ҳақда «Дарё» мухбири хабар берди.
Давлат раҳбари Конституцияга аҳолининг муносиб ҳаёт кечириши ва уй-жойга эга бўлиши тўғрисидаги янги моддаларни киритиш лозим, деб ҳисоблашини айтди.
«Аҳоли учун янги уй-жойлар қуриш ҳажмларини 1,5 баробарга ошириб, 90 мингга етказамиз. Бунда, икки йил олдин бошланган имтиёзли шартларда ипотека бериш давом эттирилади.
Келаси йилда Тошкент вилоятида «Менинг биринчи уйим» янги ипотека дастури бошланади. Дастур доирасида, биринчи навбатда турар-жойга эҳтиёжи бор ҳамда ёш оилалар учун энг қулай шартлар асосида уй-жойлар барпо этилади», — деди Шавкат Мирзиёев.
Президент бу ҳақда 22 сентябрь куни Нурафшон шаҳрида Халқ депутатлари Тошкент вилояти кенгашининг сессиясида ҳам айтиб ўтганди. Ўшанда вилоятдаги ҳар бир фуқарога бир марта янги қурилган хонадонни имтиёзли ипотекага олиш имкониятини бериш кераклигини таъкидлаганди. Шу муносабат билан келгуси йилдан «Менинг биринчи уйим» янги ипотека дастурини Тошкент вилоятидан бошлаш таклиф қилинганди.
Мурожаатномада президент жамоат транспортидаги вазият мутлақо ўзгаришини ҳам айтди.
«Тошкент шаҳри учун қўшимча мингта замонавий автобус сотиб олинади, 7 та ер усти метро бекати ишга туширилади. Буларнинг ҳисобига, ҳар куни 500 мингдан зиёд пойтахт аҳолиси ва меҳмонларига қўшимча қулайликлар яратилади. Ҳудудларда ҳам йўловчи ташиш сифатини яхшилаш мақсадида, яна мингта автобус ҳаракати йўлга қўйилади. Бу орқали, жамоат транспорти бўйича аҳвол оғир бўлган 300 та маҳалладаги 1 миллион аҳолининг узоғи яқин бўлади», — деди президент.
Давлат раҳбари 13 декабрь куни Учтепа тумани фаоллари билан ўтказилган йиғилишда бош вазирга март ойигача Тошкентга 1000 та автобус олиб келиш бўйича топшириқ берганини айтганди. «Жамоат транспортини ислоҳ қилишимиз зарур. Ютуқлар билан бирга, камчиликларимиз ҳам жуда кўп», — деган эди президент.
Мавзуга доир:
Изоҳ (0)