Айни вақтда Ўзбекистон президенти Шавкат Мирзиёев Олий Мажлисга мурожаатнома йўлламоқда. Бу ҳақда «Дарё» мухбири хабар берди.
Давлат раҳбари 2023 йили 70 та янги мактаб қурилиши, яна 460 таси кенгайтирилишини айтди.
«Хусусий инвестициялар иштирокида 100 та мактаб қуриш лойиҳалари бошланади, келаси беш йилда уларнинг сонини мингтага етказамиз», — деди президент.
Шавкат Мирзиёев йил бошидан Қорақалпоғистон ва Хоразмда 285 минг нафар бошланғич синф ўқувчилари учун бепул овқатланиш йўлга қўйилишини таъкидланди.
«Бу борада етарли тажриба орттирдик. Энди, келаси ўқув йилидан ушбу амалиёт қолган вилоятлар ва Тошкент шаҳри мактабларида ҳам жорий этилади ва бунинг учун 2,3 триллион сўм ажратилади», — деди Шавкат Мирзиёев.
Президент, шунингдек, мактаб битирувчиларининг 50 фоизи меҳнат бозорига ҳеч қандай касбга эга бўлмасдан кириб келаётгани ҳаммамизни ўйлантириши кераклигини айтди.
«Шу боис, 700 дан ортиқ касб-ҳунар мактаби, коллеж ва техникумлар имкониятидан самарали фойдаланиш зарур. Бу мақсадда 2023 йилдан бошлаб янги дастур амалга оширилади. Ҳар бир вилоятда 1 тадан техникумда Европа касбий таълим стандартлари жорий этилади. Келаси беш йилда барча коллеж ва техникумлар ушбу тизим билан қамраб олинади», — деди давлат раҳбари.
Эслатиб ўтамиз, мактаб ўқувчиларини бепул овқат билан таъминлаш тизими дастлаб Қорақалпоғистон ва Хоразм вилоятида 2022 йил 1 апрелидан жорий этилган.
Президентнинг «2022—2026 йилларда халқ таълимини ривожлантириш бўйича миллий дастурни тасдиқлаш тўғрисида»даги фармони, «Халқ таълимини ривожлантиришга оид қўшимча чора-тадбирлар тўғрисида»ги қарорига мувофиқ мактабларда ўқувчилар билан боғлиқ бир қатор ўзгаришлар юз беради. Ўқувчиларнинг қизиқиш ва қобилиятларидан келиб чиққан ҳолда улар касбга йўналтирилади ва ўқитилади.
Мавзуга доир:
Изоҳ (0)