АҚШ президенти Жо Байден ўз хавфсизлигига таҳдидлар туфайли Украинага ва пойтахт Киевга бормоқчи эмас. Бу ҳақда Politico Оқ уй мансабдорлари орасидаги манбаларига таяниб хабар берди.
«Айни пайтда Байденнинг Киевга ташриф буюриш бўйича режалари йўқ, асосан, хавфсизлик билан боғлиқ рисклар туфайли», — дейилади газета хабарида.
Аввалроқ Украина Тиббиёт ва хавфсизликка ихтисослашган International SOS ташкилоти томонидан эълон қилинган 2023 йилда саёҳат учун дунёдаги энг хавфли давлатлар рўйхатида юқори учликка кирган эди.
10 декабрь куни Пентагон Украинага 275 миллион долларлик навбатдаги ёрдам пакети ҳақида эълон қилди, унга HIMARS баравар ўт очиш реактив тизимлари ўқ-дорилари ва 155 миллиметрли артиллерия снарядлари киради.
Жо Байден АҚШ Украинага ўз ҳарбий хизматчиларини юбормаётгани, лекин унга моддий ёрдам кўрсатаётганини айтди. «Биз, худди аввалгидек, миллиардлаб долларлик моддий воситаларни жўнатяпмиз», — деб жавоб берди президент журналистларнинг саволига.
Апрель ойида Жо Байден Киевга шахсан боришга тайёрлигини айтганди. Июлда Украина президенти Владимир Зеленский Байденни яна бир марта чақирди. Ўша ойда АҚШ Конгресси делегацияси Киевга келди. Сентябрда АҚШ давлат котиби Энтони Блинкен, ноябрь бошида эса АҚШ президентининг миллий хавфсизлик бўйича маслаҳатчиси Жейк Салливан Украинага ташриф буюрди.
Аввалроқ БМТ бош котиби Антониу Гутерришнинг ўринбосари Мартин Гриффиц Херсонга ташриф буюрган эди.
Шунингдек, ноябрь ойида Украинага Буюк Британия бош вазири Риши Сунак, АҚШ Марказий разведка бошқармаси директори Уильям Бёрнс ҳам келганди.
Айни вақтда Россия президенти Владимир Путин Донбассга боришни режалаштирмаётгани хабар берилмоқда. У Донбассга «мавриди келганида» боради, аммо ҳозирча бундай ташриф режада йўқ, деди Россия раҳбарининг матбуот котиби Дмитрий Песков.
Изоҳ (0)