Зеленский: «Баъзилар Путин билан музокаралар ўтказишни таклиф қиляпти, аммо у билан нимани муҳокама қилишни билмайман»

Украина президенти Владимир Зеленский унга Россия президенти Владимир Путин билан музокаралар ўтказишни таклиф қилишаётганини айтди. Зеленскийнинг фикрича, «нарсаларга нисбатан қарашлар» ҳар хил бўлгани сабабли, улар муҳокама қиладиган ҳеч қандай мавзу йўқ.

«Биламан, баъзилар у билан музокаралар столига ўтиришни таклиф қилмоқда, лекин у билан нимани муҳокама қилишни билмайман. У ўз нуқтаи назарига тўғри келадиган тинчликни хоҳлаяпти, лекин бизнинг қарашларимиз мутлақо бошқа-бошқа», — деди Зеленский Франциянинг LCI телеканалига.

Шунингдек, у Франциянинг музокараларда воситачилик қилиш истагини ҳам изоҳлади. Украина президенти фикрича, Франция президенти Эммануэль Макроннинг Владимир Путин билан музокаралари натижа бермайди.

Россия-Украина музокаралари май ойида тўхтатиб қўйилганди. Москва сўнгги вақтларда мулоқотга тайёрлигини мунтазам тасдиқлаб келмоқда. Бироқ Россия Донецк ва Луганск халқ республикалари ҳамда Запорожье ва Херсон вилоятларини қўшиб олгач, Зеленский Россия президент Путин бўлиб қолар экан, у билан музокаралар олиб бориш имкониятидан воз кечди. Кейинроқ у бир қатор шартлар бажарилган тақдирда мулоқот олиб борилиши мумкинлигини айтди.