Ангрен нефть базасида авария содир бўлиб, 11 500 литр АИ-80 бензин ёқилғи маҳсулоти тўкилгани ҳақида хабар берилган эди. Фарғона нефтни қайта ишлаш заводи бу ҳолат ёқилғи таъминотига таъсир қилмаслигини эълон қилди.
Қайд этилишича, бугунги кунда Ангрен терминали нормал режимда ишламоқда. Ҳодиса сабаблари махсус комиссия томонидан ўрганилмоқда, унинг хулосаси бўйича расмий муносабат берилади.
Мазкур терминал Фарғона нефтни қайта ишлаш заводи маҳсулотларини, жумладан, бензин ва дизель ёқилғисини сақлаш учун ташкил этилган. 2019 йилда ҳукумат қарори билан ФНПЗ Ангрен терминали ҳам таркибига кирувчи «Саноат Энергетика Гуруҳи» МЧЖ ХК тузилмаси билан биргаликда ишончли бошқарувга ўтказилган.
Ушбу терминалдан ҳар куни Тошкент вилояти ва Тошкент шаҳри истеъмолчилари учун 1000-1100 тоннага яқин бензин ва 250-300 тонна дизель ёқилғиси жўнатилмоқда.
«Шу билан бирга, айни совуқ кунларда ёқилғига талаб ортиб бораётганини инобатга олган ҳолда Фарғона нефтни қайта ишлаш заводида АИ-80 бензинининг суткалик ишлаб чиқариш ҳажми 850 тоннадан 1000 тоннага, суюлтирилган газ ишлаб чиқариш ҳажми 30 тоннадан 50 тоннага оширилди. Барча маҳсулотлар амалдаги меъёрий-ҳуқуқий ҳужжатларга мувофиқ биржа савдолари орқали сотилади, шундан сўнг улар ёқилғи қуйиш шохобчаларига етказиб берилади.
Айни пайтда нефть базалари, нефтни қайта ишлаш заводлари ёқилғи қуйиш шохобчаларини бензин билан таъминлаш учун етарли захирага эга. Хусусан, 26,5 минг тонна «Ўзбекнефтгаз» (UNG Petro) ёқилғи қуйиш шохобчаларида сотилаётган АИ 80 маркали бензин захираси бўлиб, бу бошқа маҳсулотлар қатори нефть маҳсулоти таннархига таъсир кўрсата олмайди», — дейилади хабарда.
Мавзуга доир:
Изоҳ (0)