Қизиқчи Аваз Охун ўзбек қизиқчилари орасида илк маротаба Германиянинг Мюнхен шаҳрида яккахон концерт дастурини тақдим этди.

Бу ҳақида Аваз Охун «Дарё» мухбири Феруз Муҳаммадга берган интервьюсида гапириб берди.

Германиядан Дилшодбек деган укамиз телефон қилди, университетда ўқиб, банкда ишларкан, у ерда «Аваз Охун келсин», деган таклифлар бўлаётган экан. Шу йигит мурожаат қилиб чиқди, бўлди деб розилик билдирдик. Кейин визага ҳаракатни бошладик, виза ҳам биттада чиқди, визани олиб, рекламаларни эълон қилдик.

Мюнхенда хусусий театрлар жуда кўп экан, у ерда 100 га яқин театр бор экан, биз битта театр саҳнасини ижарага олдик. Ўша ерда концерт бўлди. Концертга Прагадан, Германиянинг бошқа ҳудудларидан, Франция чегараларидан, 800 км йўл босиб келганлар ҳам бўлди. Ҳатто бир оила концерт куни «Сизнинг концертингизни кўриш учун Мюнхенга 4 кун олдиндан келиб, шаҳарни айланиб концертингизни кутдик» деб айтди.

Концерт зали деярли тўлди. Балкон бўш бўлди, паст тўлди. Германияда концертга одам келиши менинг ақлимга сиғмаганди, очиғи. Концерт жудаям зўр ўтиб, 3 соат давом этди. Концертда янги дастурдан ҳам бўлди, эскиларидан ҳам. Ўша ерга боргунча юз берган воқеаларни ҳам айтиб бердим.

Масалан, мен Туркия орқали учдим. Самолётимиз бир соат кеч қолгани учун Яна Германияга Туркиядан кетишимиз керак эди. Эр-хотин Мюнхенга бордик, борганимизда қарасак юкларимиз йўқ, кийимлар йўқ. Кейин суриштирсак, самолёт кечикканда юкларни ортишга улгуришмаган, сумкаларимиз қолиб кетган. Кейин жўнатадиган бўлишди. Бизнинг эса Мюнхенда биринчи қиладиган ишимиз кийим магазинига бориш бўлди. Фақат эгнимизда йўлда кийиб келган кийимлар эди, меҳмонхонага кийишга енгилроқ кийимлар олдик.

Эртаси куни пойладик, сумкалар етиб келса, етиб келди, бўламса костюм-шим, туфли, ҳамма нарса олишимиз керак. Бегона жойда уни топиб, уни ўзимизга мослаш масаласи ҳам бор, ўлчамимиз ҳам идеал эмас, ҳамма кийимни кестириб киямиз. Йўқ, эртаси куни меҳмонхонага сумкаларимизни етказиб олиб келишди.

Мюнхенни бир кун айландик, у ерда Афғонистонлик қўшниларимиз меҳмон қилишди. Эртаси куни концерт бўлди, ўзим ҳам мазза қилдим.

Улар жуда соғинган экан, бу ерда шу пайтгача қизиқчиларнинг концерти бўлмаган экан. Билет сотиб, унақа концерт бўлмаган, Наврўз байрамларида ёки ўзбек кунлари қилиб сайиллар бўлган, лекин бунақа концерт бўлмаган экан.

Кейин Италияга бордик, Швейцария, Францияга бордик. Франкфуртга бордик, Европани айландик.

Эйфель минораси ҳудудига кириб кетаётганимизда бир қора танли киши турган экан. Тўсатдан ‘Сени битта расмга олиб қўяман, телефонингни бер’ деди. Олгиси келгандир деб, телефонни бериб турсам, ‘Йўқ, Эйфелни тишлаётгандек бўлиб тур’ деб қолди. Уни тушундим, кейин у айтганидек турдим. ‘О, сенинг актёрлик маҳоратинг бор экан’ деди, мени ростан ҳам актёр эканлигимни билмайди.

Кейин ‘Қаердансан’ десам, ‘Мане, Садио Мане’ деди, Сенегаллик экан. 10 доллар бердим, у менга Эйфелнинг кичик макетчасини берди.

Ўша расмни йигитлар инстаграмга қўйган экан, жуда оммалашиб кетибди, ноодатий фото бўлгани учун ликеларни роса йиғибди.

Аваз Охун, қизиқчи

Маълумот учун, Аваз Охун 1983 йил, 27 апрелда Андижон вилояти Асака туманида туғилган. Ўзбекистон давлат Санъат ва маданият институтини тугатган. 2014 йил «Туркистон» санъат саройида «Янгисини эшитдингизми?», Халқлар дўстлиги санъат саройида 2015 йил «Ўзимизнинг гаплар», 2016 йил «Самимий кулги», 2017 йил «7 дан, 70 гача», 2018 йил «Янгиси янгида», 2019 йил «Ўзбекча кулги», 2020 йил Zo‘r TV каналида ҳарбийлар учун концерт дастурларини тақдим этган. 2021 йил «Кулгиларингизни соғиндим», 2022 йилда эса «Кулгетерапия», деб номланган концерт дастурини тақдим этди. Оилали, тўрт фарзанднинг отаси.