Qiziqchi Avaz Oxun o‘zbek qiziqchilari orasida ilk marotaba Germaniyaning Myunxen shahrida yakkaxon konsert dasturini taqdim etdi.

Bu haqida Avaz Oxun “Daryo” muxbiri Feruz Muhammadga bergan intervyusida gapirib berdi.

Germaniyadan Dilshodbek degan ukamiz telefon qildi, universitetda o‘qib, bankda ishlarkan, u yerda “Avaz Oxun kelsin”, degan takliflar bo‘layotgan ekan. Shu yigit murojaat qilib chiqdi, bo‘ldi deb rozilik bildirdik. Keyin vizaga harakatni boshladik, viza ham bittada chiqdi, vizani olib, reklamalarni e’lon qildik.

Myunxenda xususiy teatrlar juda ko‘p ekan, u yerda 100 ga yaqin teatr bor ekan, biz bitta teatr sahnasini ijaraga oldik. O‘sha yerda konsert bo‘ldi. Konsertga Pragadan, Germaniyaning boshqa hududlaridan, Fransiya chegaralaridan, 800 km yo‘l bosib kelganlar ham bo‘ldi. Hatto bir oila konsert kuni “Sizning konsertingizni ko‘rish uchun Myunxenga 4 kun oldindan kelib, shaharni aylanib konsertingizni kutdik” deb aytdi.

Konsert zali deyarli to‘ldi. Balkon bo‘sh bo‘ldi, past to‘ldi. Germaniyada konsertga odam kelishi mening aqlimga sig‘magandi, ochig‘i. Konsert judayam zo‘r o‘tib, 3 soat davom etdi. Konsertda yangi dasturdan ham bo‘ldi, eskilaridan ham. O‘sha yerga borguncha yuz bergan voqealarni ham aytib berdim.

Masalan, men Turkiya orqali uchdim. Samolyotimiz bir soat kech qolgani uchun Yana Germaniyaga Turkiyadan ketishimiz kerak edi. Er-xotin Myunxenga bordik, borganimizda qarasak yuklarimiz yo‘q, kiyimlar yo‘q. Keyin surishtirsak, samolyot kechikkanda yuklarni ortishga ulgurishmagan, sumkalarimiz qolib ketgan. Keyin jo‘natadigan bo‘lishdi. Bizning esa Myunxenda birinchi qiladigan ishimiz kiyim magaziniga borish bo‘ldi. Faqat egnimizda yo‘lda kiyib kelgan kiyimlar edi, mehmonxonaga kiyishga yengilroq kiyimlar oldik.

Ertasi kuni poyladik, sumkalar yetib kelsa, yetib keldi, bo‘lamsa kostyum-shim, tufli, hamma narsa olishimiz kerak. Begona joyda uni topib, uni o‘zimizga moslash masalasi ham bor, o‘lchamimiz ham ideal emas, hamma kiyimni kestirib kiyamiz. Yo‘q, ertasi kuni mehmonxonaga sumkalarimizni yetkazib olib kelishdi.

Myunxenni bir kun aylandik, u yerda Afg‘onistonlik qo‘shnilarimiz mehmon qilishdi. Ertasi kuni konsert bo‘ldi, o‘zim ham mazza qildim.

Ular juda sog‘ingan ekan, bu yerda shu paytgacha qiziqchilarning konserti bo‘lmagan ekan. Bilet sotib, unaqa konsert bo‘lmagan, Navro‘z bayramlarida yoki o‘zbek kunlari qilib sayillar bo‘lgan, lekin bunaqa konsert bo‘lmagan ekan.

Keyin Italiyaga bordik, Shveysariya, Fransiyaga bordik. Frankfurtga bordik, Yevropani aylandik.

Eyfel minorasi hududiga kirib ketayotganimizda bir qora tanli kishi turgan ekan. To‘satdan ‘Seni bitta rasmga olib qo‘yaman, telefoningni ber’ dedi. Olgisi kelgandir deb, telefonni berib tursam, ‘Yo‘q, Eyfelni tishlayotgandek bo‘lib tur’ deb qoldi. Uni tushundim, keyin u aytganidek turdim. ‘O, sening aktyorlik mahorating bor ekan’ dedi, meni rostan ham aktyor ekanligimni bilmaydi.

Keyin ‘Qayerdansan’ desam, ‘Mane, Sadio Mane’ dedi, Senegallik ekan. 10 dollar berdim, u menga Eyfelning kichik maketchasini berdi.

O‘sha rasmni yigitlar instagramga qo‘ygan ekan, juda ommalashib ketibdi, noodatiy foto bo‘lgani uchun likelarni rosa yig‘ibdi.

Avaz Oxun, qiziqchi

Ma’lumot uchun, Avaz Oxun 1983-yil, 27-aprelda Andijon viloyati Asaka tumanida tug‘ilgan. O‘zbekiston davlat San’at va madaniyat institutini tugatgan. 2014-yil “Turkiston” san’at saroyida “Yangisini eshitdingizmi?”, Xalqlar do‘stligi san’at saroyida 2015-yil “O‘zimizning gaplar”, 2016-yil “Samimiy kulgi”, 2017-yil “7 dan, 70 gacha”, 2018-yil “Yangisi yangida”, 2019-yil “O‘zbekcha kulgi”, 2020-yil Zo‘r TV kanalida harbiylar uchun konsert dasturlarini taqdim etgan. 2021-yil “Kulgilaringizni sog‘indim”, 2022-yilda esa “Kulgeterapiya”, deb nomlangan konsert dasturini taqdim etdi. Oilali, to‘rt farzandning otasi.