Россия Хавфсизлик кенгаши раиси ўринбосари Дмитрий Медведевнинг айтишича, Россияга душман давлатлар сонининг кўпайиши фонида Москва қудратли, хусусан, янги тамойилларга асосланган қуроллар ишлаб чиқаришни оширмоқда. Бу ҳақда у ўзининг Telegram-каналида маълум қилди.
«Биз энг кучли, жумладан, янги тамойилларга асосланган қуролларни ишлаб чиқаришни оширмоқдамиз», — деб ёзган Медведев. У бошқа тафсилотларни келтирмаган.
Россия Хавфсизлик Кенгаши раиси ўринбосарининг сўзларига кўра, «душман» нафақат Украинада, балки Европа, Шимолий Америка, Япония, Австралия, Янги Зеландия ва бошқа бир қатор мамлакатларда жойлашиб турибди.
6 декабрь куни Дмитрий Медведев ҳарбий-саноат комплекси корхоналари «соат механизми каби» ишлаши кераклигини, чунки ҳозир кўп нарсани «ҳарбий рельсга ўтказиш» талаб қилинаётганини айтди. Сентябрь ойи охирида Россия президенти Владимир Путин мудофаа корхоналарида ишлаб чиқариш имкониятларини ошириш, «ускуналардан максимал даражада фойдаланиш» ва ишлаб чиқариш вақтини қисқартириш бўйича кўрсатма берганди.
Изоҳ (0)